හිටපු ජනාධිපති ආර්යාව වන මහාචාර්ය මෛත්රී වික්රමසිංහ මහත්මිය අපරාධ පරීක්ෂණ දෙපාර්තමේන්තුවේ මූල්ය අපරාධ විමර්ශන කොට්ඨාසය (FCID) වෙත කැඳවීම සම්බන්ධයෙන් මෙරට විද්වතුන්, මාධ්යවේදීන්, ස්ත්රීවාදී ක්රියාකාරීන් සහ නීතිඥයන් පිරිසක් සිය දැඩි කනස්සල්ල පළ කරමින් නිවේදනයක් නිකුත් කර තිබේ. ඇය වෙත මෙලෙස සිතාසි නිකුත් කර ඇත්තේ, ඇයගේ ස්වාමිපුරුෂයා වන හිටපු ජනාධිපති රනිල් වික්රමසිංහ මහතාට එරෙහිව පවතින විමර්ශනයකට අදාළව ප්රකාශයක් ලබා ගැනීම සඳහාය.
මෙම විමර්ශනය බ්රිතාන්යයේ වුල්වර්හැම්ප්ටන් විශ්වවිද්යාලය (University of Wolverhampton) මගින් මහාචාර්ය වික්රමසිංහ මහත්මිය වෙත පිරිනැමූ ගෞරව මහාචාර්ය ධුරය පිළිගැනීමේ උත්සවයට සහභාගී වීම සඳහා රජයේ මුදල් අවභාවිත කළ බවට එල්ල වී ඇති චෝදනාවක් මත පදනම් වූවකි. කෙසේ වෙතත්, අදාළ නිවේදනය මගින් විද්වතුන් පෙන්වා දෙන්නේ එම ගෞරව නාමය ඇය විසින් වසර තිහකට අධික කාලයක් ස්ත්රී පුරුෂ සමාජභාවය සහ සමානාත්මතාවය පිළිබඳව සිදු කරන ලද ස්වාධීන ශාස්ත්රීය මෙහෙවර අගය කරමින් පිරිනැමුණක් බවයි.
කැලණිය විශ්වවිද්යාලයේ ඉංග්රීසි අංශයේ ජ්යෙෂ්ඨ මහාචාර්යවරියක වන මෛත්රී වික්රමසිංහ මහත්මිය, ශ්රී ලංකාවේ විශ්වවිද්යාල පද්ධතිය තුළ ස්ත්රී පුරුෂ සමාජභාවය පිළිබඳ අධ්යයන මධ්යස්ථාන ඇති කිරීමට මූලිකත්වය ගත් ප්රමුඛ විද්වතියකි. ඇයගේ ශාස්ත්රීය ජයග්රහණ රටට අභිමානයක් විය යුතු මිස, ඒවා දේශපාලනික හේතු මත අවමානයට හෝ හිරිහැරයට ලක් නොකළ යුතු බව එම නිවේදනයේ අවධාරණය කර ඇත. ස්වාධීන විද්වතුන් දේශපාලන පළිගැනීම්වලට ලක් කිරීම ප්රජාතන්ත්රවාදී සමාජයකට නොගැලපෙන බව විද්වතුන් 85 දෙනෙකුගේ අත්සනින් යුතුව නිකුත් කළ මෙම නිවේදනයේ වැඩිදුරටත් සඳහන් වේ.
පසුගිය පෙබරවාරි 20 වනදා ඇයට FCIDය හමුවේ පෙනී සිටින ලෙස දන්වා තිබුණද, සෞඛ්ය හේතූන් මත එදින පෙනී සිටීමට නොහැකි වී ඇති බව වාර්තා වේ. මෙම පරීක්ෂණ කටයුතු කිසිදු පක්ෂග්රාහීත්වයකින් තොරව සාධාරණව සහ විනිවිදභාවයකින් යුතුව සිදු කරන ලෙස විද්වත් පිරිස බලධාරීන්ගෙන් ඉල්ලා සිටිති.
