මුදල් විශුද්ධීකරණ චෝදනා මත යෝෂිත රාජපක්ෂ සහ ඔහුගේ මිත්තණිය වන ඩේසි ෆොරස්ට් මහත්මියට එරෙහිව පවරා තිබූ නඩුව අද (25) සුවිශේෂී හැරවුම් ලක්ෂ්යයකට පැමිණියේය. ඒ, ඉදිරිපත් වූ වෛද්ය වාර්තා සලකා බැලූ කොළඹ මහාධිකරණය ඩේසි ෆොරස්ට් මහත්මිය නඩුවෙන් නිදහස් කිරීමට නියෝග කිරීමත් සමඟය.
රුපියල් මිලියන 73ක අයථා වත්කම් උපයාගැනීමේ චෝදනාව මත නීතිපතිවරයා ගොනු කර තිබූ මෙම නඩුව මෙතෙක් පවත්වාගෙන ගියේ විත්තිකරුවන් දෙදෙනාටම එරෙහිවය. කෙසේ වෙතත්, ඩේසි ෆොරස්ට් මහත්මියට නඩු විභාගයකට මුහුණ දීමට සුදුසු මානසික සෞඛ්ය තත්ත්වයක් පවතීද යන්න පිළිබඳව අධිකරණ වෛද්ය නිලධාරියා ලබාදුන් විශේෂ වාර්තාව අද නියෝජ්ය සොලිසිටර් ජනරාල්වරයා විසින් අධිකරණයට ඉදිරිපත් කරන ලදී. එම වාර්තාවට අනුව ඇය නඩු විභාගයකට මුහුණ දීමට සුදුසු මානසික තත්ත්වයක නොසිටින බව තහවුරු විය.
ඒ අනුව ඇයව නිදහස් කළ විනිසුරුවරයා, නඩුවේ පළමු විත්තිකරු වන යෝෂිත රාජපක්ෂට එරෙහිව පමණක් නඩුව ඉදිරියට පවත්වාගෙන යාමට අවසර ලබා දුන්නේය. මේ සඳහා යෝෂිත රාජපක්ෂට පමණක් අදාළ වන පරිදි සකස් කළ ‘සංශෝධිත අධි චෝදනා පත්රයක්’ ගොනු කිරීමට නීතිපතිවරයා පියවර ගත් අතර, ඒ අනුව මින් ඉදිරියට ඔහුට පමණක් මෙම චෝදනාවලට අධිකරණය හමුවේ පිළිතුරු බැඳීමට සිදුවනු ඇත.
