නවසීලන්තයේ හිටපු අග්රාමාත්ය ජසින්ඩා ආර්ඩර්න් මහත්මිය සිය පවුල සමඟ ඕස්ට්රේලියාවේ පදිංචියට ගොස් ඇති බව ඇයගේ ප්රකාශකයෙකු තහවුරු කර තිබේ. ඇමෙරිකා එක්සත් ජනපදයේ හාවර්ඩ් විශ්වවිද්යාලයේ සිය පර්යේෂණ සහ අධ්යයන කටයුතු නිම කිරීමෙන් අනතුරුව, ඇය සිය ස්වාමිපුරුෂයා වන ක්ලාක් ගේෆර්ඩ් සහ දියණිය සමඟ මෙලෙස ඕස්ට්රේලියාව පදනම් කර ගනිමින් ජීවත් වීමට තීරණය කර ඇත. ඇය සිඩ්නි නුවර උතුරු වෙරළාසන්න ප්රදේශවලින් නිවාස සොයමින් සිටින බවට පැතිර ගිය තොරතුරුවලින් පසු මෙම පුවත නිල වශයෙන් තහවුරු විය.
දැනට ඕස්ට්රේලියාවේ රැකියාවල නිරත වන බවත්, එමගින් සිය මව්බිම වන නවසීලන්තය සමඟ සමීපව කටයුතු කිරීමට වැඩි අවස්ථාවක් ලැබෙන බවත් ඇයගේ කාර්යාලය සඳහන් කළේය. කෙසේ වෙතත්, නවසීලන්ත වැසියන් විශාල පිරිසක් ඉහළ ජීවන වියදම සහ රැකියා හිඟය හේතුවෙන් ඕස්ට්රේලියාව බලා සංක්රමණය වන පසුබිමක, එරට හිටපු නායිකාවක මෙලෙස විදේශගත වීම නවසීලන්තය තුළ යම් සංවාදයකට තුඩු දී ඇත. නවසීලන්ත වැසියන්ගෙන් බහුතරයක් ඉහළ වැටුප් අපේක්ෂාවෙන් ඕස්ට්රේලියාව තෝරා ගන්නා අතර, එරටදී ඔවුන්ට රැකියා කිරීමට විශේෂ පහසුකම් හිමි වේ.
ලොව ලාබාලතම කාන්තා නායිකාවක ලෙස 2017 වසරේදී බලයට පත් වූ ජසින්ඩා ආර්ඩර්න්, ක්රයිස්ට්චර්ච් ප්රහාරය සහ කොවිඩ් වසංගතය වැනි අර්බුද හමුවේ දැක්වූ මානුෂීය නායකත්වය හේතුවෙන් ලෝකයේම අවධානය දිනා ගත්තාය. ඇය 2023 ජනවාරි මාසයේදී සිය ධුරයෙන් ඉල්ලා අස් වූයේ තවදුරටත් එම වගකීම දැරීමට තමන් සතු ජවය ප්රමාණවත් නොවන බව පවසමිනි. සිය දේශපාලන ජීවිතය පිළිබඳ ස්මරණ ග්රන්ථය (Memoir) 2025 වසරේදී ප්රකාශයට පත් කළ ඇය, මේ වන විටත් මාර්ගගත අන්තවාදය වැළැක්වීමේ ‘ක්රයිස්ට්චර්ච් කෝල්’ ව්යාපෘතියේ සහ ‘අර්ත්ෂොට්’ පදනමේ සක්රීයව කටයුතු කරමින් සිටියි.
