2025 වසර අවසානය වන විට ලෝකයේ සමස්ත ණය ප්රමාණය ඇමරිකානු ඩොලර් ට්රිලියන 348 ක ඓතිහාසික උපරිමයකට ළඟා වී ඇති බව ජාත්යන්තර මූල්ය අරමුදල (IMF) සිය නවතම වාර්තාව මගින් අනාවරණය කරයි. මෙය වසංගත සමයෙන් පසුව වාර්තා වූ වේගවත්ම වාර්ෂික ණය වර්ධනය වන අතර, ගතවූ වසර තුළ පමණක් ගෝලීය ණය ප්රමාණයට ඩොලර් ට්රිලියන 29 ක් අලුතින් එකතු වී තිබේ. මෙම දැවැන්ත ණය බර ඉහළ යාමට ප්රධානතම හේතුව වී ඇත්තේ රජයන් විසින් ලබාගත් ණය ප්රමාණය ඉහළ යාම වන අතර, විශේෂයෙන්ම අමෙරිකා එක්සත් ජනපදය, චීනය සහ යුරෝ කලාපය මෙම වර්ධනයෙන් හතරෙන් තුනකට (3/4) වගකිව යුතු බව එම වාර්තාව පෙන්වා දෙයි.
වර්තමාන ගෝලීය ණය ප්රමාණය ලෝක නිෂ්පාදිතයෙන් 308% ක් ලෙස සටහන් වන අතර, නැගී එන වෙළඳපලවල ණය අනුපාතය දළ දේශීය නිෂ්පාදිතයෙන් 235% ඉක්මවූ වාර්තාගත මට්ටමකට පැමිණ ඇත. සමස්ත ණය ව්යුහය සලකා බැලීමේදී රජයේ ණය ඩොලර් ට්රිලියන 106.7 ක් ලෙසත්, මූල්ය නොවන ආයතනික ණය ඩොලර් ට්රිලියන 100.6 ක් සහ ගෘහස්ථ ණය ඩොලර් ට්රිලියන 64.6 ක් ලෙසත් වාර්තා වේ. 2026 වසරේදී ලෝක ආර්ථිකය 3.3% ක මට්ටමක පවතිනු ඇතැයි අපේක්ෂා කළත්, ඉහළ යන ණය බර සැහැල්ලු කිරීමට එය ප්රමාණවත් නොවන බව විද්වතුන් පෙන්වා දෙති. රාජ්ය මූල්ය හිඟය දිගින් දිගටම පැවතුණහොත් 2026 වසරේදී ද ගෝලීය ණය බර තවදුරටත් ඉහළ යා හැකි බවට ජාත්යන්තර මූල්ය අරමුදල වැඩිදුරටත් අනතුරු අඟවයි.
