පසුගිය අඟහරුවාදා සෞඛ්ය අමාත්යාංශ පරිශ්රය තුළ කාගේත් අවධානය දිනාගත් විශේෂ සිදුවීමක් වාර්තා විය. ඒ, හිටපු ජනාධිපති මෛත්රීපාල සිරිසේන මහතා වත්මන් සෞඛ්ය අමාත්ය වෛද්ය නලින්ද ජයතිස්ස මහතා හමුවීම සඳහා අමාත්යාංශය වෙත පැමිණීමයි. හිටපු සෞඛ්ය අමාත්යවරයෙකු ද වන සිරිසේන මහතාට මෙම පරිශ්රය බෙහෙවින් හුරුපුරුදු ස්ථානයක් වූ අතර, ඔහු ඇමතිවරයාව සිටි සමයේ සේවය කළ සේවකයින් පිරිසක් තවමත් එහි රාජකාරියේ නිරතව සිටීම විශේෂත්වයක් විය. අමාත්යවරයා එම අවස්ථාවේ විශේෂ සාකච්ඡාවක නිරතව සිටි බැවින් හිටපු ජනාධිපතිවරයාට මද වේලාවක් රැඳී සිටීමට සිදු වූ අතර, එම කාලය තුළ ඔහු අමාත්ය කාර්ය මණ්ඩලයේ නිලධාරියෙකු සමඟ සුහද කතාබහක නිරත වෙමින් අතීත මතකයන් ආවර්ජනය කළේය.
එහිදී සෞඛ්ය අමාත්යවරයාගේ නිල අසුන පෙන්වමින්, “මේ පුටුවේ සෞඛ්ය ඇමති විදියට ඉඳලා මම ජනාධිපති පුටුවටත් ගියා” යැයි සිරිසේන මහතා සිනාසෙමින් පැවසූ ප්රකාශය කාර්යාල සේවකයින් අතර මහත් කුතුහලයක් සහ කසුකුසුවක් ඇති කිරීමට සමත් විය. අනතුරුව ඇමතිවරයා හමුවූ හිටපු ජනාධිපතිවරයා, තමන් විසින් ඉදිකළ පොළොන්නරුව වකුගඩු රෝහලේ දැනට පවතින අඩුපාඩු රැසක් පෙන්වා දෙමින් ඒවා විසඳා දෙන ලෙස ඉල්ලීමක් කළේය. එම රෝහලේ පවතින දුෂ්කරතා පිළිබඳව තමන් දැනුවත් බවත්, රෝහල් කාර්ය මණ්ඩලය ද මීට පෙර ඒ පිළිබඳ කරුණු පෙන්වා දී ඇති බවත් අමාත්ය නලින්ද ජයතිස්ස මහතා එහිදී සඳහන් කළේය. ඒ අනුව සෞඛ්ය අධ්යක්ෂ ජනරාල්වරයා ඇතුළු නිලධාරීන් කැඳවා අදාළ ගැටලු විසඳීමට අමාත්යවරයා එසැණින් පියවර ගත්තේය.
