පවතින විදුලිබල පනතට අනුව, බාල ගල්අඟුරු ආනයනය හේතුවෙන් සිදුවූ පාඩුව විදුලි බිලට එකතු කර ජනතාවගෙන් අය කර ගැනීමට කිසිදු නීතිමය ඉඩකඩක් නොමැති බව විපක්ෂ නායක සජිත් ප්රේමදාස මහතා අවධාරණය කරයි. ඊයේ (26) මාධ්ය වෙත විශේෂ ප්රකාශයක් කරමින් ඔහු කියා සිටියේ, මෙම ගල්අඟුරු ගනුදෙනු පිටුපස ඇති දූෂිත ක්රියාවලිය පිළිබඳව වෝහාරික විගණනයක් (Forensic Audit) වහාම පවත්වා සැබෑ වගකිවයුත්තන් හෙළිදරව් කළ යුතු බවයි. නිසි ප්රමිතියෙන් තොර ගල්අඟුරු භාවිතය නිසා ජනන යන්ත්රවලට සිදුවන හානිය සහ ඒ හරහා සිදුවන මූල්ය අලාභය පාලකයින්ගේ අකාර්යක්ෂමතාවයේ ප්රතිඵලයක් මිස ජනතාවගේ වරදක් නොවන බව ඔහු පෙන්වා දුන්නේය.
මේ අතර, ආන්දෝලනාත්මක ගල්අඟුරු ආනයන ක්රියාවලිය හරහා රජයට සිදුව ඇති බව කියන බිලියන ගණනක පාඩුව සම්බන්ධයෙන් සමගි ජන බලවේගයේ දූෂණ විරෝධී කමිටුව ඊයේ අල්ලස් හෝ දූෂණ විමර්ශන කොමිෂන් සභාව වෙත නිල පැමිණිල්ලක් ද ඉදිරිපත් කළේය. ප්රසම්පාදන ක්රියාවලිය උල්ලංඝනය කරමින් සිදුකර ඇති මෙම ගනුදෙනු සම්බන්ධයෙන් අපක්ෂපාතී පරීක්ෂණයක් පවත්වා වංචනිකයින්ට එරෙහිව නීතිය ක්රියාත්මක කරන ලෙස එම කමිටුව ඉල්ලා සිටියි. බලශක්ති ක්ෂේත්රය තුළ සිදුවන මෙවැනි අක්රමිකතා හේතුවෙන් අවසානයේ පීඩාවට පත්වන්නේ සාමාන්ය විදුලි පාරිභෝගිකයා බවත්, එය වැළැක්වීමට විපක්ෂයක් ලෙස උපරිමයෙන් මැදිහත් වන බවත් එහිදී වැඩිදුරටත් ප්රකාශ විය.
