මුළු මහත් සමාජයම වෙලාගෙන ඇති මත්ද්රව්ය ව්යසනය සහමුලින්ම පිටුදැකීම අරමුණු කරගත් “රටම එකට ජාතික මෙහෙයුම” වැඩසටහනට සමගාමීව, 2026 මාර්තු 01 වන ඉරිදා සිට විශේෂ “විෂ මත්ද්රව්ය නිවාරණ සතියක්” ක්රියාත්මක කිරීමට රජය තීරණය කර තිබේ. මෙම ජාතික මෙහෙයුම් සභාවේ තීරණයට අනුව, රාජ්ය පරිපාලන, පළාත් සභා සහ පළාත් පාලන අමාත්යාංශය විසින් අංක 07/2026 දරන රාජ්ය පරිපාලන චක්රලේඛය ද මේ වන විට නිකුත් කර ඇත. මත්ද්රව්ය අලෙවිය මර්දනය කිරීම පමණක් නොව, දැනටමත් මත් උවදුරට ඇබ්බැහි වී සිටින පිරිස් ඉන් මුදාගෙන පුනරුත්ථාපනයට යොමු කිරීම සඳහා අවශ්ය සමාජ කතිකාවතක් සහ මහජන සහයෝගය ගොඩනැගීම මෙම සතියේ ප්රධාන අරමුණයි.
මෙම සතිය පුරා දිවයිනේ සියලුම රාජ්ය ආයතන, පාසල් සහ බිම් මට්ටමේ ප්රජා සංවිධාන කේන්ද්ර කරගනිමින් පුළුල් දැනුවත් කිරීමේ වැඩසටහන් මාලාවක් ක්රියාත්මක කිරීමට සැලසුම් කර ඇත. විශේෂයෙන්ම පාසල් දරු දැරියන් සහ ගුරුවරුන් ඉලක්ක කරගත් නවීන මාදිලියේ අධ්යාපනික වැඩසටහන් ක්රියාත්මක වන අතර, පොදු ප්රවාහන සේවාවන් වන බස් රථ, ත්රිරෝද රථ සහ පාසල් ප්රවාහන සේවා යොදාගනිමින් මත්ද්රව්ය විරෝධී ප්රචාරක මෙහෙයුම් දියත් කෙරෙනු ඇත. රජයේ අමාත්යාංශ ඇතුළු සියලුම අනුබද්ධ ආයතනවල නිලධාරීන්ගේ සෘජු දායකත්වය මත මෙම ජාතික මෙහෙයුම සාර්ථක කර ගැනීමට කටයුතු යොදා තිබේ.
නීතිය ක්රියාත්මක කරන ආයතන මඟින් මත්ද්රව්ය ජාවාරම්කරුවන්ට එරෙහිව දැඩි ක්රියාමාර්ග ගන්නා අතරතුර, එම මෙහෙයුමට සමගාමීව මෙවැනි සමාජ දැනුවත් කිරීම් සිදු කිරීම තුළින් මත්ද්රව්ය ව්යසනයෙන් තොර සුරක්ෂිත හෙටක් නිර්මාණය කිරීමට රජය අපේක්ෂා කරයි. මෙය හුදෙක් රාජ්ය වැඩසටහනක් පමණක් නොව, තම දරුවන්ගේත් අනාගත පරපුරේත් ආරක්ෂාව වෙනුවෙන් සමස්ත ජාතියම එකා වන්ව පෙළ ගැසිය යුතු තීරණාත්මක මොහොතක් බව ද බලධාරීහු පෙන්වා දෙති.
