සිම්බාබ්වේ හිටපු ජනාධිපති රොබට් මුගාබේගේ බාල පුත්රයෙකු වන බෙලර්මින් චතුන්ගා මුගාබේ (Bellarmine Chatunga Mugabe), දකුණු අප්රිකාවේ ජොහැනස්බර්ග් නුවරදී පුද්ගලයෙකුට වෙඩි තබා ඝාතනය කිරීමට තැත් කිරීමේ චෝදනාව මත එරට අධිකරණය හමුවට ඉදිරිපත් කර තිබේ. පෙබරවාරි 19 වන දින ජොහැනස්බර්ග්හි සුඛෝපභෝගී ප්රදේශයකදී 23 හැවිරිදි තරුණයෙකුගේ පිටට වෙඩි තැබීමේ සිද්ධියකට අදාළව මෙම චෝදනා එල්ල වී ඇත.
28 හැවිරිදි චතුන්ගා මුගාබේ සහ ඔහු සමඟ සිටි තවත් පුද්ගලයෙකුට මිනීමැරීමට තැත් කිරීම, යුක්තිය ඉටුකිරීමට බාධා කිරීම, නීති විරෝධී ලෙස ගිනි අවි සහ පතොරම් ළඟ තබා ගැනීම මෙන්ම සොරකම් කිරීම යන චෝදනා ද එල්ල වී තිබේ. මීට අමතරව, ඔවුන් නීති විරෝධී ලෙස දකුණු අප්රිකාවේ රැඳී සිටින සංක්රමණිකයන් බවට ද සැක කෙරෙන අතර ඒ සම්බන්ධයෙන් ආගමන විගමන පනත යටතේ ද නඩු පවරා ඇත. වෙඩි වැදීමෙන් තුවාල ලැබූ පුද්ගලයා තවමත් රෝහල් ගතව ප්රතිකාර ලබන බව වාර්තා වේ.
මුගාබේගේ පුතුන් දෙදෙනා වන රොබට් ජූනියර් සහ චතුන්ගා මුගාබේ මීට පෙර ද ඔවුන්ගේ අති සුඛෝපභෝගී ජීවන රටාව සමාජ මාධ්ය හරහා ප්රදර්ශනය කිරීම නිසා දැඩි කතාබහට ලක් වූහ. වසර 40කට ආසන්න කාලයක් සිම්බාබ්වේ පාලනය කළ රොබට් මුගාබේගේ පවුලේ සාමාජිකයන්ට එරෙහිව මීට පෙර ද විවිධ දූෂණ හා සාපරාධී චෝදනා එල්ල වී තිබූ අතර, ඔවුන්ගේ මව වන ග්රේස් මුගාබේ ද ප්රචණ්ඩ ක්රියා සහ අධික වියදම් සම්බන්ධයෙන් කුප්රකට චරිතයක් ලෙස හැඳින්වේ.
