‘දිට්වා’ කාලගුණික ආපදාවෙන් විපතට පත් වූවන් යළි නගාසිටුවීම සඳහා පිහිටුවන ලද “ශ්රී ලංකා රී බිල්ඩින්” (Sri Lanka Rebuilding Fund) අරමුදල, ආපදාව සිදුවී මාස තුනක් ගතවී තිබියදීත් මෙතෙක් ව්යවස්ථාපිත ලෙස ස්ථාපනය නොකිරීම සම්බන්ධයෙන් රජයේ මුදල් පිළිබඳ පාර්ලිමේන්තු කාරක සභාව මුදල් අමාත්යාංශ ප්රධානීන්ට දැඩි ලෙස දෝෂාරෝපණය කර තිබේ.
අදාළ අරමුදල විධිමත් ලෙස නීතිගත කරන තෙක් “ශ්රී ලංකා රී බිල්ඩින්” යන නාමය භාවිත කිරීමෙන් වළකින ලෙස කාරක සභාවේ සභාපතිවරයා අමාත්යාංශ නිලධාරීන්ට උපදෙස් ලබා දුන්නේය. දිට්වා විපතින් පීඩාවට පත් ජනතාව වෙනුවෙන් ලැබෙන දේශීය හා විදේශීය සියලු ආධාර මුදල් දැනට තැන්පත් කෙරෙන්නේ භාණ්ඩාගාර නියෝජ්ය ලේකම්වරයාගේ ගිණුමට බවත්, එම මුදල් පරිපාලනය සඳහා නීත්යානුකූල අරමුදලක් ස්ථාපනය කිරීම අත්යවශ්ය බවත් මෙහිදී අවධාරණය කෙරිණි.
අරමුදල නීතිගත කිරීමේ ප්රමාදයක් පවතින බව මුදල් අමාත්යාංශයේ නිලධාරීන් විසින් පිළිගත් අතර, ඒ සඳහා අවශ්ය නීතිමය රාමුව වහාම සකස් කරන ලෙස කාරක සභාව වැඩිදුරටත් නියෝග කළේය. ආධාර මුදල් භාවිතයේ විනිවිදභාවය සහ වගවීම තහවුරු කිරීම සඳහා මෙවැනි ව්යවස්ථාපිත අරමුදලක් කඩිනමින් පිහිටුවීම අතිශය තීරණාත්මක බව විචාරකයෝ පෙන්වා දෙති.
