වසර 1,700ක් පැරණි ශ්රී ලංකාවේ ජේතවනාරාම මහා ස්තූපය ලෝකය මවිත කළ ඉංජිනේරුමය ආශ්චර්යයක් ලෙස හඳුන්වමින් CNN Travel පුවත් සේවය විශේෂ ලිපියක් පළ කර තිබේ. ක්රිස්තු වර්ෂ 301 දී පමණ වැඩ අවසන් කරන ලද මෙම දැවැන්ත ආගමික ස්මාරකය, ලොව ගඩොල් භාවිතයෙන් කළ විශාලතම නිර්මාණය ලෙස සැලකෙන අතර එය ඉතිහාසයේ එක් යුගයක ලෝකයට අමතක වී තිබූ බව එම වාර්තාව පෙන්වා දෙයි.
භූමිකම්පා, දශක ගණනාවක නොසලකා හැරීම් සහ සිවිල් යුද්ධ වැනි බාධක රැසක් මධ්යයේ නොසැලී පවතින මෙම නිර්මාණය, එදා ලොව පැවති උසම ගොඩනැගිලි අතරට ද එක්ව තිබූ බව එහි සඳහන් වේ. ආගමික තරගකාරීත්වයක් පදනම් කර ගනිමින් නිර්මාණය වූ මෙම ස්මාරකය වර්තමානයේ යුනෙස්කෝ ලෝක උරුමයක් ලෙස පිළිගැනෙන නමුත්, ශ්රී ලංකාවෙන් බැහැරව ලෝකයේ බොහෝ පිරිසකට මෙම අසිරිමත් නිර්මාණය පිළිබඳව ඇත්තේ අල්ප දැනුමක් බව CNN පුවත් සේවය වැඩිදුරටත් අවධාරණය කරයි.
