ශ්රී ලංකා ක්රිකට් ක්ෂේත්රය වර්තමානයේ මුහුණ දී ඇති බරපතල බිඳවැටීමට සහ එහි පාලන තන්ත්රය තුළ පවතින බව කියන දූෂණ හා අක්රමිකතාවලට එරෙහිව සංවිධානය කර ඇති දැවැන්ත “Go Home” විරෝධතාව අද, එනම් මාර්තු මස පළමු ඉරිදා දින පෙරවරු 11:00 ට කොළඹ ශ්රී ලංකා ක්රිකට් පාලක මණ්ඩල මූලස්ථානය ඉදිරිපිටදී පැවැත්වීමට සියලු කටයුතු යොදා තිබේ. 2026 විස්සයි විස්ස ලෝක කුසලාන තරගාවලියේදී ශ්රී ලංකා කණ්ඩායම දැක්වූ අසාර්ථක ක්රීඩා විලාසය සහ සුපිරි 8 වටයෙන් ඉවතට විසිවීම හේතුවෙන් කුපිත වූ ක්රීඩා ලෝලීන් මෙම අරගලය සඳහා එක්වෙමින් සිටින්නේ රටක් ලෙස අභිමානයක් ගෙන දුන් ක්රිකට් ක්රීඩාව නැවත නිවැරදි මාවතට ගැනීමේ මූලික අරමුණ ඇතිවය.
රාජංගානයේ පූජ්ය සත්තරතන හිමියන්ගේ ප්රධානත්වයෙන් සහ සංවිධායකත්වයෙන් පැවැත්වෙන මෙම විරෝධතාව හරහා වත්මන් ක්රිකට් පාලක මණ්ඩලයේ සභාපති ශම්මි සිල්වා ඇතුළු දූෂිත නිලධාරීන් වහාම එම ධුරවලින් ඉවත් විය යුතු බවට ප්රබල බලපෑමක් එල්ල කෙරේ. මීට අමතරව, ක්රීඩකයන් තේරීමේදී පවතින අසාධාරණකම් ඉවත් කර සෑම දිස්ත්රික්කයකම දක්ෂතා දක්වන ක්රීඩකයන්ට ශ්රී ලංකා කණ්ඩායම නියෝජනය කිරීමට සම අවස්ථාව ලබා දෙන විනිවිද පෙනෙන පද්ධතියක් සකස් කරන ලෙසද සංවිධායකයෝ රජයෙන් සහ බලධාරීන්ගෙන් අවධාරණය කර සිටිති.
ජාති, ආගම් හෝ පක්ෂ භේදයකින් තොරව ක්රිකට් ක්රීඩාවට ආදරය කරන සියලුම ශ්රී ලාංකිකයන්ට මෙම සාමකාමී විරෝධතාවය සමඟ එක්වන ලෙස සංවිධායකයෝ විවෘත ආරාධනයක් කර ඇති අතර, දිවයිනේ විවිධ ප්රදේශවල සිටින ක්රීඩා ලෝලීන් මේ වන විටත් කොළඹට පැමිණෙමින් සිටින බව වාර්තා වේ. පෞද්ගලික වාසි තකා ක්රීඩාව විනාශ කරන පාලකයන්ට එරෙහිව ජාතියක් ලෙස නැගී සිටීමට මෙය සුදුසුම අවස්ථාව බවත්, රටේ ක්රිකට් අනාගතය වෙනුවෙන් පද්ධතියේ වෙනසක් අත්යවශ්ය බවත් අරගලකරුවන් වැඩිදුරටත් ප්රකාශ කර සිටිති.
