මැදපෙරදිග කලාපයේ පවතින අස්ථාවර තත්ත්වය හේතුවෙන් ඉන්ධන හිඟයක් ඇතිවිය හැකි බවට පවතින අනියත බියක් නිසා ඉන්ධන රැස්කිරීමට උත්සාහ කරන පුද්ගලයන්ට සහ කණ්ඩායම්වලට එරෙහිව දැඩි නීතිමය ක්රියාමාර්ග ගන්නා බව පොලිස් මූලස්ථානය නිවේදනය කරයි. නීති විරෝධී ලෙස ඉන්ධන තොග රැස්කිරීම, වැඩි මිලට විකිණීම සහ සමාජ මාධ්ය හරහා ඉන්ධන හිඟයක් පිළිබඳව අසත්ය තොරතුරු පතුරුවන පිරිස් සම්බන්ධයෙන් විමර්ශන ආරම්භ කර ඇති බව පොලිස් මාධ්ය කොට්ඨාසය අද (01) නිකුත් කළ නිවේදනයක දැක්වේ.
ලංකා ඛනිජ තෙල් නීතිගත සංස්ථාව (CPC) නිල වශයෙන් ප්රකාශ කර ඇත්තේ මෙරටට අවශ්ය තරම් ඉන්ධන සංචිත පවතින බැවින් මහජනතාව අනවශ්ය ලෙස කලබල විය යුතු නැති බවයි. එහෙත්, ඇතැම් පිරිස් කෑන්, බැරල් සහ වෙනත් භාජනවලට ඉන්ධන ලබාගැනීමට කටයුතු කරන බව පොලිසිය නිරීක්ෂණය කර තිබේ. මේ හේතුවෙන්, බලපත්රලාභී කාර්මික කටයුතු, කෘෂිකර්මාන්තය, ධීවර කටයුතු සහ අත්යවශ්ය ගෘහස්ථ අවශ්යතා සඳහා පමණක් භාජනවලට ඉන්ධන නිකුත් කරන ලෙසත්, සෙසු පිරිස් සඳහා එවැනි ක්රියාවලින් වැළකී සිටින ලෙසත් සියලුම පිරවුම්හල් වෙත උපදෙස් ලබා දී ඇත.
අදාළ නියෝග උල්ලංඝනය කරමින් කටයුතු කරන පිරිස් අත්අඩංගුවට ගැනීමට සහ අධිකරණමය ක්රියාමාර්ග ගැනීමට දිවයිනේ සියලුම පොලිස් ස්ථාන දැනුවත් කර තිබේ. ඉන්ධන සැපයුම සම්බන්ධයෙන් පවතින සැබෑ තත්ත්වය පිළිබඳව නිල නිවේදන කෙරෙහි පමණක් විශ්වාසය තබන ලෙසත්, අසත්ය පුවත් පතුරුවන පුද්ගලයන් පිළිබඳව අවධානයෙන් පසුවන ලෙසත් පොලිසිය මහජනතාවගෙන් ඉල්ලා සිටියි.
