අද (02) උදෑසන වන විට උතුරු ඊශ්රායලයේ ගෝලාන් කඳුකරයට ආසන්න ප්රදේශවලට සතුරු ඩ්රෝන යානා ඇතුළු වී ඇති බවට සැකපිට “රතු නිවේදන” (Red Alerts) නිකුත් කර ඇති බව විදෙස් පුවත් සේවා තහවුරු කරයි. මජ්ඩාල් ෂම්ස් (Majdal Shams), බුකාටා (Buq’ata), නිම්රොඩ් (Nimrod) සහ මසාඩා (Mas’ada) යන ගම්මාන ඇතුළු ලෙබනන් සීමාවට ආසන්න පදිංචිකරුවන්ට වහාම ආරක්ෂිත ස්ථාන කරා යන ලෙස දැනුම් දී තිබේ. ඊශ්රායල ආරක්ෂක බලකාය (IDF) සඳහන් කරන්නේ මෙම ඩ්රෝන යානා ලෙබනනයේ සිට ක්රියාත්මක වන හිස්බුල්ලා සංවිධානය විසින් එල්ල කරන ලද්දක් බවට සැක කරන බවයි.
මෙම තත්ත්වය හමුවේ ඊශ්රායල ගුවන් හමුදාව සිය ගුවන් ආරක්ෂණ පද්ධති සක්රීය කර ඇති අතර, අහසේ සැකකටයුතු යානා හඳුනාගැනීම සඳහා විශේෂ මෙහෙයුමක් ආරම්භ කර ඇත. ඉරානයට එරෙහිව ඇමරිකාව සහ ඊශ්රායලය දියත් කර ඇති “ඔපරේෂන් එපික් ෆියුරි” සහ “රෝරිං ලයන්” මෙහෙයුම්වලට ප්රතිචාර වශයෙන් ඉරාන හිතවාදී කණ්ඩායම් විසින් මෙලෙස උතුරු ඊශ්රායලය ඉලක්ක කර ඇති බව පෙනේ. මජ්ඩාල් ෂම්ස් ප්රදේශයේ පසුගිය වසරේ සිදුවූ දරුණු රොකට් ප්රහාරයෙන් පසුව මෙම ප්රජාවන් ඉහළ සෝදිසියකින් පසුවන අතර, මෙම නවතම ඩ්රෝන තර්ජනය හේතුවෙන් දේශ සීමාවේ යුදමය උණුසුම තවදුරටත් ඉහළ ගොස් තිබේ.
