අමෙරිකාව සහ ඊශ්රායලය ඉරානයට එල්ල කළ ප්රහාරත් සමඟ මැදපෙරදිග කලාපයේ ගුවන් කලාප රැසක් වසා දැමීම හේතුවෙන් ලක්ෂ සංඛ්යාත ගුවන් මගීන් පිරිසක් දැඩි අසීරුතාවයට පත්ව සිටිති. ඉරානය, ඊශ්රායලය, කටාර්, සිරියාව, ඉරාකය, කුවේට් සහ බහරේන් යන රටවල් සිය ගුවන් කලාප සිවිල් ගුවන් ගමන් සඳහා වසා දමා ඇති අතර එක්සත් අරාබි එමීර් රාජ්යය ද සිය ගුවන් සීමාවන් තාවකාලිකව සහ අර්ධ වශයෙන් වසා දැමීමට පියවර ගෙන තිබේ. මේ හේතුවෙන් ලොව කාර්යබහුලම ගුවන් තොටුපළක් වන ඩුබායි ජාත්යන්තර ගුවන් තොටුපළ මෙන්ම අබුඩාබි සහ දෝහා ගුවන් තොටුපළවල මෙහෙයුම් කටයුතු ද අඩාල වී ඇත.
පවතින තත්ත්වය සැලකිල්ලට ගනිමින් බ්රිතාන්ය රජය සිය ඉතිහාසයේ විශාලතම ගුවන් මගීන් ඉවත් කිරීමේ මෙහෙයුමක් සඳහා සූදානම් වන අතර, බලපෑමට ලක් වූ කලාපවල රැඳී සිටින බ්රිතාන්ය වැසියන් 76,000කට අධික පිරිසක් ආරක්ෂිතව මෙරටට ගෙන්වා ගැනීමට සැලසුම් කරමින් සිටියි. ඩුබායි ජාත්යන්තර ගුවන් තොටුපළ සහ බර්ජ් අල් අරාබි හෝටලය ඉරාන ප්රතිප්රහාරවල ඉලක්ක බවට පත්වීමෙන් හානි සිදුව ඇති බවත්, අබුඩාබි ගුවන් තොටුපළේ සිදු වූ ප්රහාරයකින් පුද්ගලයෙකු මියගොස් තවත් කිහිප දෙනෙකු තුවාල ලබා ඇති බවත් වාර්තා වේ. එමිරේට්ස්, කටාර් එයාර්වේස් සහ එතිහාඩ් වැනි ප්රධාන ගුවන් සමාගම් සියලුම ගුවන් ගමන් අත්හිටුවා ඇති අතර ඉරිදා දිනය තුළ පමණක් ගුවන් ගමන් 3,400කට අධික සංඛ්යාවක් අවලංගු කර තිබේ.
ඉරාන ගුවන් සීමාව අවම වශයෙන් අඟහරුවාදා උදෑසන දක්වා වසා තැබෙන බව නිවේදනය කර ඇති අතර, මෙය ජාත්යන්තර ගුවන් ගමන් රැසක් ප්රමාද වීමට හෝ වෙනත් මාර්ග ඔස්සේ ගමන් කිරීමට හේතු වී ඇත. ශ්රී ලංකා විදේශ කටයුතු අමාත්යාංශය ද මීට පෙර සඳහන් කළ පරිදි, මැදපෙරදිග රැඳී සිටින ශ්රී ලාංකිකයන්ට ද මෙම ගුවන් ගමන් අවහිරතා සෘජුව බලපාන බැවින්, ගුවන් තොටුපළ වෙත යාමට පෙර සිය ගුවන් ගමන් වලංගුභාවය අන්තර්ජාලය ඔස්සේ පරීක්ෂා කර බලන ලෙස උපදෙස් දෙනු ලැබේ. ශ්රී ලංකා රජය ද මෙරට රැඳී සිටින සංචාරකයන්ගේ වීසා කාලය දින 14කින් දීර්ඝ කර ඇත්තේ මෙම ගුවන් ගමන් අවහිරතා හේතුවෙන් ඔවුන්ට සිය රටවල් බලා යාමට නොහැකි වීම සැලකිල්ලට ගනිමිනි.
