අමෙරිකාව සහ ඉරානය අතර පවතින ගැටුම හමුවේ මැදපෙරදිග කලාපය පුරා දැවැන්ත යුදමය වාතාවරණයක් හටගෙන තිබේ. අමෙරිකානු සහ ඊශ්රායල ප්රහාරවලට ප්රතිචාර වශයෙන් ඉරානය විසින් රටවල් කිහිපයක පිහිටි අමෙරිකානු මධ්යස්ථාන සහ සිවිල් යටිතල පහසුකම් ඉලක්ක කර මිසයිල සහ ඩ්රෝන ප්රහාර එල්ල කර ඇත.
ඉරානයේ ටෙහෙරාන් අගනුවර ඇතුළු ස්ථාන කිහිපයකට අමෙරිකානු සහ ඊශ්රායල ප්රහාර එල්ල වී ඇති අතර, ඊට ප්රතිචාර ලෙස ඉරානය විසින් ඊශ්රායලයේ ටෙල් අවිව්, ජෙරුසලම සහ රෝෂ් හයින් නගර වෙත මිසයිල ප්රහාර එල්ල කර තිබේ. බෙයිට් ෂෙමේෂ් හි සිදුවූ මිසයිල ප්රහාරයකින් පුද්ගලයන් නව දෙනෙකු මියගොස් තවත් පිරිසක් තුවාල ලබා ඇත.
ඊශ්රායල හමුදා විසින් බේරූට් නගරයේ සිටි හිස්බුල්ලා ජ්යෙෂ්ඨ සාමාජිකයන් ඉලක්ක කර ප්රහාර එල්ල කර ඇති අතර, ඉරාකයේ බැග්ඩෑඩ් ගුවන් තොටුපොළේ සිටින අමෙරිකානු භටයන් ඉලක්ක කර ඩ්රෝන ප්රහාරයක් එල්ල වී තිබේ. එසේම එර්බිල් හි අමෙරිකානු කොන්සල් කාර්යාලය අසලට එල්ල වූ රොකට් ප්රහාර කිහිපයක් ව්යර්ථ කිරීමට ආරක්ෂක අංශ සමත්ව ඇත.
ඉරාන මිසයිල කොටස් පතිත වීමෙන් සිරියාවේ අයින් ටර්මා හි ළමුන් තිදෙනෙකු ඇතුළු හතර දෙනෙකු තුවාල ලබා තිබේ. බහරේනයේ අමෙරිකානු පස්වන නාවික බලඇණියට සම්බන්ධ ස්ථාන ඉලක්ක කර ප්රහාර එල්ල වීමත් සමඟ මනමා නගරයේ පිපිරීම් වාර්තා වූ අතර, එහි ඇති අමෙරිකානු තානාපති කාර්යාලය තාවකාලිකව වසා දැමීමට පියවර ගෙන ඇත.
මෙම ගැටුම්කාරී තත්ත්වය හේතුවෙන් ඩුබායි ඇතුළු කලාපයේ ගුවන් ගමන් අත්හිටුවීමට හෝ වෙනත් මාර්ග වෙත යොමු කිරීමට ද බලධාරීන් පියවර ගෙන තිබේ.
