ඉරාන උත්තරීතර ජාතික ආරක්ෂක මණ්ඩලයේ (SNSC) ලේකම් අලි ලාරිජානි (Ali Larijani) අද (02) විශේෂ නිවේදනයක් නිකුත් කරමින් අවධාරණය කළේ, වත්මන් යුදමය තත්ත්වය හමුවේ ඉරානය කිසිසේත්ම ඇමරිකා එක්සත් ජනපදය සමඟ සාකච්ඡා මේසයට නොපැමිණෙන බවයි. ඇමරිකානු ජනාධිපති ඩොනල්ඩ් ට්රම්ප් විසින් ඉරානයේ නව නායකත්වය සාකච්ඡා සඳහා කැමැත්ත පළ කර ඇති බවට සිදු කළ ප්රකාශයන් සම්පූර්ණයෙන්ම ප්රතික්ෂේප කළ ලාරිජානි, “අපි ඇමරිකාව සමඟ සාකච්ඡා කරන්නේ නැහැ” (We will not negotiate with the United States) යනුවෙන් සිය X ගිණුමේ සටහනක් තබමින් ප්රකාශ කර තිබේ.
අයතුල්ලා අලි කමේනිගේ ඝාතනයෙන් පසු ඉරානයේ ආරක්ෂක සහ යුද උපායමාර්ග මෙහෙයවන ප්රධානතම රුව බවට පත්ව සිටින අලි ලාරිජානි වැඩිදුරටත් පවසා ඇත්තේ, ඇමරිකාව සහ ඊශ්රායලය ඉරාන ජාතියේ හදවතට පිහියකින් ඇන ඇති බවත්, ඒ වෙනුවෙන් ඔවුන්ට කිසිදා අමතක නොවන පාඩමක් උගන්වන බවත්ය. ඉරාන ඉතිහාසයේ දක්ෂතම රාජ්යතාන්ත්රිකයෙකු ලෙස සැලකෙන ඔහු, මීට පෙර පවත්වාගෙන ගිය මධ්යස්ථ පිළිවෙත අතහැර දැන් දැඩි මතධාරී ස්ථාවරයකට පැමිණ ඇති බව ආරක්ෂක විශ්ලේෂකයෝ පෙන්වා දෙති. ඉරානයේ අන්තර්කාලීන පාලක මණ්ඩලය (Interim Leadership Council) සමඟ එක්ව ඔහු මේ වන විට ඇමරිකානු කඳවුරු ඉලක්ක කර දියත් කරන ප්රතිප්රහාර රැල්ල සම්බන්ධීකරණය කරමින් සිටින බව වාර්තා වේ.
