සුප්රසිද්ධ ‘Transformers’ චිත්රපට මාලාවේ නළු ශියා ලැබෆ් (Shia LaBeouf) විසින් සමලිංගික පුද්ගලයන් පිළිබඳව සිදු කරන ලද ආන්දෝලනාත්මක ප්රකාශයක් හේතුවෙන් ඔහු ජාත්යන්තර මට්ටමින් දැඩි දෝෂදර්ශනයට ලක්ව සිටියි. නිව් ඕර්ලියන්ස් හි ‘Mardi Gras’ උත්සවය අතරතුර ඇති වූ ගැටුමක් සම්බන්ධයෙන් දින කිහිපයක් ඇතුළත දෙවරක් අත්අඩංගුවට පත්වීමෙන් පසු, ‘Channel 5 News’ යූටියුබ් නාලිකාව සමඟ පැවැත්වූ සම්මුඛ සාකච්ඡාවකදී ඔහු මෙම ප්රකාශය සිදු කර ඇත. එහිදී ඔහු පවසා ඇත්තේ “විශාල සිරුරක් සහිත සමලිංගික පුද්ගලයන් තමන්ට බියක් ඇති කරන” බවයි.
පෙබරවාරි 17 වැනිදා බාර් එකක් අසලදී ඇති කරගත් රණ්ඩුවක් සම්බන්ධයෙන් ඔහුට පහරදීම් චෝදනා දෙකක් එල්ල වූ අතර, පෙබරවාරි 26 වැනිදා ඔහු නැවත අත්අඩංගුවට ගනු ලැබුවේ එම රණ්ඩුව අතරතුර ඔහු විසින් සමලිංගික විරෝධී අපහාසාත්මක වදන් (Homophobic insults) භාවිත කළ බවට අධිකරණයට කරුණු අනාවරණය වීමත් සමඟය. කෙසේ වෙතත්, සිය හැසිරීම පිළිබඳව කණගාටුව පළ කරනවා වෙනුවට, සමලිංගික පිරිමින් තමන්ට සමීප වීමට උත්සාහ කිරීම නිසා තමන් බියට පත් වූ බව පවසමින් සිය ප්රචණ්ඩකාරී හැසිරීම සාධාරණීකරණය කිරීමට ඔහු උත්සාහ කර තිබේ. “ඔවුන් මගේ කලව ස්පර්ශ කළා, මම බය වුණා. ඒක සමලිංගික විරෝධී නම්, මම ඒක පිළිගන්නවා,” යනුවෙන් ඔහු එහිදී පවසා ඇත.
සම්මුඛ සාකච්ඡාව අතරතුර සිය මතය වරින් වර වෙනස් කළ ලැබෆ්, තමන් මත්පැන් පානය කර සිටි නිසා පවසන දේවල් තේරුමක් නොමැති බවත් පවසා තිබේ. තමන් යම් පුද්ගලයෙකු ස්පර්ශ කිරීම වැරදි බව පිළිගන්නා ඔහු, ඒ වෙනුවෙන් සිරගත වීමට වුවද සූදානම් බව ප්රකාශ කර ඇත. පොලිස් වාර්තාවලට අනුව, ඔහු ඉතා ආක්රමණශීලී ලෙස හැසිරෙමින් පුද්ගලයන් දෙදෙනෙකුට පහර දී ඇති අතර එක් අයෙකුගේ නාසයට ද තුවාල සිදු කර තිබේ. මත්පැන් පානයට වඩා තමන්ට පවතින “කුඩා මිනිස් සංකීර්ණය” (Small man complex) සහ කෝපය පාලනය කරගත නොහැකි වීම මෙම ගැටුමට හේතුව බව ඔහු අවසානයේ සඳහන් කර ඇත.
