ඇමරිකාව, ඊශ්රායලය සහ ඉරානය අතර පවතින ගැටුම්කාරී තත්ත්වය හමුවේ ඉන්දියාවේ ප්රාන්ත කිහිපයක ප්රචණ්ඩ ක්රියා ඇතිවීමේ අවදානමක් පවතින බවට ඉන්දීය ස්වදේශ කටයුතු අමාත්යාංශය (MHA) අනතුරු අඟවා තිබේ. ඉරාන උත්තරීතර නායක අයතුල්ලා අලි කමේනිගේ ඝාතනයට එරෙහිව ජම්මු-කාශ්මීරයේ සහ ලක්නව්හි දැනටමත් විරෝධතා ආරම්භ වී ඇති පසුබිමක මෙම පියවර ගෙන ඇත.
මැදපෙරදිග සිදුවන දේශපාලනික වෙනස්වීම් ඉන්දියාව තුළ වාර්ගික නොසන්සුන්තාවන් ඇති කිරීමට (Ripple effects) ඉඩ ඇති බැවින් දැඩි අවධානයෙන් පසුවන ලෙස සියලුම ප්රාන්ත රජයන්ට දන්වා ඇත. විශේෂයෙන්ම ආගමික මධ්යස්ථාන හරහා ජනතාව ප්රචණ්ඩත්වයට පොළඹවන අන්දමේ දේශනා පවත්වන පුද්ගලයන් පිළිබඳව දැඩි ලෙස විමසිලිමත් වන ලෙස උපදෙස් දී තිබේ.
ලක්නව්හි බඩා ඉමාම්බාරා (Bada Imambara) ප්රදේශයට රැස්වූ ෂියා මුස්ලිම් ප්රජාව ඇමරිකාවට සහ ඊශ්රායලයට එරෙහිව දැඩි විරෝධයක් පළ කර ඇති අතර, මෙම තත්ත්වය අනෙකුත් ප්රාන්තවලට ද පැතිර යාමේ අවදානමක් පවතී.
අග්රාමාත්ය නරේන්ද්ර මෝදි මහතාගේ ප්රධානත්වයෙන් ඉරිදා පැවැති හදිසි ආරක්ෂක රැස්වීමේදී, මැදපෙරදිග කලාපයේ වෙසෙන ඉන්දියානු පුරවැසියන්ගේ ආරක්ෂාව තහවුරු කිරීමටත්, දේශීය ආරක්ෂාව පවත්වා ගැනීමටත් නිලධාරීන්ට උපදෙස් ලබා දී ඇත.
