මීට වසර දහනවයකට පෙර, එනම් 2007 වසරේදී පුද්ගලයෙකු අමානුෂික ලෙස ඝාතනය කර මළ සිරුර ගමන් බෑගයක බහා අත්තනගලු ඔයට දැමූ සැකකරුවෙකු කටුනායක ගුවන් තොටුපොළේදී අත්අඩංගුවට ගැනීමට කැලණිය කොට්ඨාස අපරාධ විමර්ශන කාර්යාංශය සමත්ව තිබේ. ඉකුත් 26 වනදා මෙලෙස අත්අඩංගුවට පත්ව ඇත්තේ මීගමුව, පෙරියමුල්ල ප්රදේශයේ පදිංචි 63 හැවිරිදි පුද්ගලයෙකි. ඔහු ඉතාලියේ සිටින සිය බිරිඳ වෙත යාම සඳහා මෙරටින් පලා යාමට උත්සාහ කළ අවස්ථාවේදී මෙලෙස නීතියේ රැහැනට හසුවිය.
2007 පෙබරවාරි 10 වනදා වත්තල හැඳල ප්රදේශයේ පදිංචි සමන් මිරිස්ස ආරච්චි නමැති පුද්ගලයා උල් පිහියකින් ඇන ඝාතනය කර, සිරුර සූට්කේසයක දමා ගම්පහ තම්මිට මාර්ගයේ පිහිටි අත්තනගලු ඔයට දමා සැකකරු පලා ගොස් තිබුණි. වසර ගණනාවක් තිස්සේ නොවිසඳුණු අපරාධයක් ලෙස පැවති මෙම සිද්ධිය පිළිබඳව කැලණිය කොට්ඨාස භාර ජ්යෙෂ්ඨ පොලිස් අධිකාරීවරයාගේ උපදෙස් මත සිදුකළ දීර්ඝ විමර්ශනයකින් පසු සැකකරු හඳුනා ගැනීමට හැකි විය. අපරාධය සිදුකරන විට 42 හැවිරිදි වියේ පසුවූ මොහු, වසර 19ක් තිස්සේ ඉතා උපක්රමශීලීව සැඟව සිට ඇත.
පොලිස් විමර්ශනවලදී හෙළි වී ඇත්තේ මෙම ඝාතනයට හේතුව මරණකරුගේ බිරිඳ සමඟ පැවති අනියම් සබඳතාවක් බවයි. සැකකරු මීට පෙර අවස්ථාවකදී ද මරණකරුගේ රථයට බෝම්බයක් අටවා ඔහුව ඝාතනය කිරීමට උත්සාහ කර ඇති අතර, එම අවස්ථාවේදී ඔහු බරපතළ තුවාල ලබා දිවි ගලවා ගෙන තිබේ. අත්අඩංගුවට ගත් සැකකරු ලබන මාර්තු 13 වනදා දක්වා රක්ෂිත බන්ධනාගාර ගත කිරීමට වැලිසර මහේස්ත්රාත් අධිකරණය නියෝග කළ අතර, සිද්ධියට සම්බන්ධ තවත් සැකකරුවන් කිහිප දෙනෙකු අත්අඩංගුවට ගැනීමට පොලිසිය පරීක්ෂණ පවත්වයි.
