වර්තමාන ලෝකය වයසට යාම පාලනය කිරීමට විවිධ කෘත්රිම ක්රම සොයද්දී, 93 හැවිරිදි සුෂුම්නා (Sushumna) නම් ඇමෙරිකානු කාන්තාව තම සරල ජීවන රටාව හරහා නිරෝගීව සිටීමේ සැබෑ රහස ලොවට හෙළි කරයි. ඇමෙරිකාවේ කැලිෆෝනියා ප්රාන්තයේ උපන් ඇය, පසුගිය දශක දෙකක පමණ කාලයක සිට වසරේ වැඩි කාලයක් ඉන්දියාවේ තමිල්නාඩු ප්රාන්තයේ අධ්යාත්මික ප්රජාවක් සමඟ ගත කිරීමට හුරු වී සිටින්නීය.
වයස අවුරුදු 90 ඉක්මවා තිබුණද, ඇය තවමත් ඉතා ක්රියාශීලීව තම වැඩ කටයුතු තනිවම කරගන්නා අතර ඕනෑම තැනකට යාම සඳහා පාපැදියක් භාවිතා කිරීමට වඩාත් කැමැත්තක් දක්වයි. සන්ධි ඉදිමීම (Arthritis) හැරුණු විට ඇයට වෙනත් කිසිදු බරපතළ සෞඛ්ය ගැටලුවක් නොමැති වීම විශේෂත්වයකි.
ඇයගේ දීර්ඝායුෂ රහස පිළිබඳව අදහස් දක්වමින් ඇය පවසන්නේ, ස්වභාවික ආහාර ඉතා සුළු ප්රමාණයක් ගැනීම සහ පසුගිය දශක කිහිපය පුරාම කිසිදු බටහිර ඖෂධයක් (No drugs) භාවිතා නොකිරීම තම නිරෝගී බවට මූලික හේතුව වූ බවයි. ඇය සිනහමුසු මුහුණින් පවසන්නේ සැබෑ සෞඛ්යය ඇත්තේ අප සිතනවාට වඩා ඉතා සරල තැනක බවයි.
විශාල සමාගමක විකුණුම් කළමනාකාරිනියක ලෙස සාර්ථක වෘත්තීය ජීවිතයක් ගත කළ ඇය, 2001 වසරේ සිට මෙම සරල ජීවන රටාවට අවතීර්ණ වී ඇත. තමන් අදහන ආගමික ඉගැන්වීම් අනුව ජීවත් වීමත්, නිරන්තරයෙන් මිතුරන් සමඟ සබඳතා පවත්වමින් ධනාත්මකව සිතීමත් ඇයගේ මානසික සුවයට හේතු වී තිබේ.
සුෂුම්නාගේ මෙම ආදර්ශමත් ජීවන රටාව මේ වන විට සමාජ මාධ්ය ජාලාවල විශාල අවධානයක් දිනාගෙන ඇති අතර, බොහෝ දෙනා පවසන්නේ නිරෝගී බව යනු මිල අධික ජිම් සාමාජිකත්වයන් හෝ ප්රෝටීන් කුඩු මත රඳා පවතින්නක් නොවන බවයි.
