ඉන්දියාවේ උසස් අධ්යාපන අවස්ථා පිළිබඳව විදේශීය සිසුන් දැනුවත් කිරීම සඳහා සංවිධානය කරනු ලබන ‘Study in India’ දැවැන්ත ප්රදර්ශනය සහ ප්රවර්ධන වැඩසටහන එළඹෙන අප්රේල් මාසයේදී ඩුබායිහිදී පැවැත්වීමට ඉන්දීය අධ්යාපන අමාත්යාංශය සැලසුම් කර ඇත. ඉන්දීය අධ්යාපන අමාත්ය ධර්මේන්ද්ර ප්රධාන් මහතා ප්රකාශ කළේ ඉන්දියාව මේ වන විට ලොව සුරක්ෂිත සහ දැනුම පදනම් කරගත් කේන්ද්රස්ථානයක් බවට පත්ව ඇති බැවින් මැදපෙරදිග වෙසෙන විදේශිකයන්ට ඉන්දියාව අධ්යාපනය සඳහා හොඳම විකල්පය බවයි.
මෙම ප්රදර්ශනය මුලින් මාර්තු 8 වැනිදා ඩුබායිහිදී ආරම්භ කිරීමට නියමිතව තිබුණද, ඇමරිකාව සහ ඊශ්රායලය විසින් ඉරානයට එල්ල කළ ප්රහාර සහ ඊට ප්රතිචාර ලෙස ඉරානය විසින් ගල්ෆ් කලාපීය රටවලට එල්ල කරන ප්රහාර නිසා ඇති වූ යුදමය වාතාවරණය හමුවේ එය අප්රේල් මාසය දක්වා කල් තබා ඇත. මෙම වැඩසටහන සඳහා ඉන්දියාවේ රජයේ සහ පෞද්ගලික විශ්වවිද්යාල 30කට අධික ප්රමාණයක් සහභාගී වීමට නියමිතය.
විදේශීය සිසුන්ට වීසා සහ අධ්යාපන පාඨමාලා පිළිබඳ නිවැරදි තොරතුරු ලබා දීම සඳහා තෝරාගත් රටවල ඉන්දීය තානාපති කාර්යාල තුළ විශේෂ තොරතුරු මධ්යස්ථාන (Helpdesks) පිහිටුවීමට ද අමාත්යාංශය පියවර ගෙන ඇත. දැනට ඉන්දියාවේ විදේශීය සිසුන් ලක්ෂ 1.2ක් පමණ ඉගෙනුම ලබන අතර, රජයේ ඉලක්කය වන්නේ 2030 වසර වන විට සෑම වසරකම අලුතින් විදේශීය සිසුන් ලක්ෂ 2ක් ඉන්දියාවට ගෙන්වා ගැනීමයි.
