අපකීර්තිමත් ව්යාපාරික ජෙෆ්රි එප්ස්ටයින්ගේ මරණය පිළිබඳව අමෙරිකානු හිටපු ජනාධිපති බිල් ක්ලින්ටන්ගෙන් එරට නියෝජිත මන්ත්රී මණ්ඩලයේ අධීක්ෂණ කමිටුව පසුගියදා දැඩි ලෙස ප්රශ්න කර තිබේ. පසුගිය සතියේ දින දෙකක් පුරා රහසිගතව සිදුකළ මෙම ප්රශ්න කිරීම්වල වීඩියෝ දර්ශන මාර්තු 02 වනදා ප්රසිද්ධියට පත් කෙරිණි. එප්ස්ටයින් සිය දිවි නසාගත් බව ඔබ විශ්වාස කරන්නේදැයි එහිදී නැගුණු ප්රශ්නයකට පිළිතුරු දෙමින් ක්ලින්ටන් ප්රකාශ කළේ, “මම දන්නේ නැහැ, මම හිතන්නේ ඔහු අවසානයේ හසු වූ නිසා එසේ වෙන්න ඇති, නමුත් ඇත්තම කියනවා නම් ඒ ගැන මම දන්නේ නැහැ, ඔබ දන්නෙත් නැහැ, අප කිසිවෙකුත් ඇත්ත දන්නේ නැහැ” යනුවෙනි.
මීට පෙර එප්ස්ටයින් සම්බන්ධ පරීක්ෂණ සඳහා සහභාගී වීම ක්ලින්ටන් යුවළ ප්රතික්ෂේප කර තිබුණද, අධිකරණයට අපහාස කිරීමේ චෝදනා එල්ල වීමේ අවදානම හමුවේ ඔවුන් සාක්ෂි දීමට එකඟ වී ඇත. ඒ අනුව කොංග්රස් මණ්ඩලය හමුවේ සාක්ෂි දීමට බලකෙරුණු පළමු අමෙරිකානු ජනාධිපතිවරයා බවට බිල් ක්ලින්ටන් පත්ව තිබේ. ප්රශ්න කිරීම් අතරතුර ක්ලින්ටන්ගේ නීතිඥයන් ඔහු සහ එප්ස්ටයින් අතර පැවති සබඳතාවය ‘මිත්රත්වයක්’ නොව ‘හිතවත්කමක්’ (Friendly) ලෙස හැඳින්වීමට දැඩි උත්සාහයක නිරත වූ බව ද වාර්තා වේ.
මීට අමතරව, එප්ස්ටයින්ගේ ලිපිගොනුවල සඳහන් වූ ක්ලින්ටන් කාන්තාවක සමඟ පිහිනුම් තටාකයක සිටින ඡායාරූපය පිළිබඳව ද මෙහිදී ප්රශ්න කෙරිණි. එය බෲනායි රාජ්යයේ පුණ්ය කටයුත්තක් සඳහා ගිය ගමනකදී ගත් එකක් බවත්, එහි සිටි කාන්තාව තමන් හඳුනන්නේ නැති බවත් ක්ලින්ටන් පවසා ඇත. එමෙන්ම එප්ස්ටයින්ගේ පෞද්ගලික ගුවන් යානයකදී තමන්ට ගෙල පිරිමැදීමේ ප්රතිකාරයක් (Massage) ලබා දුන් තරුණිය ලිංගික අපයෝජනයට ලක්වූ තැනැත්තියක බව තමන් දැන නොසිටි බව ද හිටපු ජනාධිපතිවරයා දිවුරුම් පිට ප්රකාශ කර තිබේ.
