වත්මන් රජය දූෂණයෙන් තොරව නිවැරදි ගමනක් යමින් සිටින බැවින්, තමන්ගේ සහයෝගය නිරතුරුව රජයට ලබා දෙන බවත්, දූෂිත විපක්ෂයට එරෙහිව නව සන්ධානයක් ගොඩනගන බවත් ෆීල්ඩ් මාෂල් සරත් ෆොන්සේකා මහතා ප්රකාශ කළේය. මහනුවර ශ්රී දළදා සමිඳුන් වැඳපුදා ගැනීමෙන් අනතුරුව මල්වතු පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනායක ස්වාමින්ද්රයන් වහන්සේ බැහැදුටු අවස්ථාවේදී ඔහු මේ බව පවසා සිටියේය. විපක්ෂයේ සිටින කණ්ඩායම් එකතු වී සිටින්නේ ජනතාවට සේවය කිරීමට නොව ඔවුන්ගේ පටු වාසි තකා බව ද හෙතෙම මෙහිදී අවධාරණය කළේය.
තමන් දේශපාලනයට පිවිසෙන සමයේ රට පාලනය කළ පිරිස අද විපක්ෂය නියෝජනය කරන බවත්, එදා ඔවුන් සිදුකළ වංචා සහ දූෂණ තමන් දිගින් දිගටම විවේචනය කළ බවත් ෆොන්සේකා මහතා සිහිපත් කළේය. යුද මෙහෙයුම් පැවති සමයේ පවා මහින්ද සහ ගෝඨාභය රාජපක්ෂ යන මහත්වරුන් සටන් විරාම පනවමින් ඊට බාධා කිරීමට උත්සාහ කළ ආකාරයත්, ඔවුන්ගේ දූෂිත ගනුදෙනු පිළිබඳවත් තමන් මීට පෙර විස්තරාත්මකව කරුණු අනාවරණය කර ඇති බවත් ඔහු මහනාහිමියන් හමුවේ කියා සිටියේය.
වත්මන් රජය යටතේ ජනාධිපතිවරයා හෝ මැති ඇමැතිවරුන් රටේ දේපළ අවභාවිත කරමින් කෝටිපතියන් වී නොමැති බවත්, ඔවුන් රට වෙනුවෙන් කැප කිරීම් කරන බවත් ෆොන්සේකා මහතා පෙන්වා දුන්නේය. පසුගිය පාලන සමයන්හි මෙන් පවුල් පාලනයක් හෝ දේපළ කොල්ලකෑමක් වත්මන් රජය තුළ දැකිය නොහැකි බැවින්, රටේ සිදුවෙමින් පවතින මෙම විශාල වෙනසට තමන් ධෛර්යය ලබා දෙන බව ද ඔහු වැඩිදුරටත් පැවසීය. පැවති දූෂිත ක්රමය වෙනස් කිරීමට ජනතාව තුළ පවතින කැමැත්ත මත පදනම්ව මෙම නව දේශපාලන සන්ධානය ඉදිරියට ගෙන යන බව ද ඔහු මාධ්ය හමුවේ ප්රකාශ කළේය.
