මැදපෙරදිග කලාපයේ උග්රවන යුදමය තත්ත්වය සහ ඒ ආශ්රිතව ගුවන් අවකාශයන් වසා දැමීම සැලකිල්ලට ගනිමින්, පාකිස්ථානය ද සිය වාණිජ ගුවන් කලාපය අර්ධ වශයෙන් වසා දැමීමට අද (මාර්තු 03) තීරණය කර තිබේ. පාකිස්ථාන ගුවන්තොටුපළ අධිකාරිය (PAA) නිකුත් කළ නිවේදනයකට අනුව, කරච්චි සහ ලාහෝර් යන ගුවන් තොරතුරු කලාපවල (FIRs) තෝරාගත් ගුවන් මාර්ග කොටස් අද සිට මාර්තු 31 දක්වා දිනපතා පෙරවරු 9.00 සිට පස්වරු 3.00 දක්වා (දේශීය වේලාවෙන්) වසා තැබෙනු ඇත.
පසුගිය පැය 24 තුළ පමණක් පාකිස්ථානය සහ ඩුබායි, දෝහා, අබුඩාබි, මස්කට් සහ සාජා වැනි ගමනාන්ත අතර ජාත්යන්තර ගුවන් ගමන් 184ක් පමණ අවලංගු කර ඇත. පසුගිය සෙනසුරාදා සිට මේ දක්වා පාකිස්ථානය හරහා ක්රියාත්මක වීමට නියමිතව තිබූ ගුවන් ගමන් 500කට අධික ප්රමාණයක් අවලංගු කර ඇති අතර, දහස් සංඛ්යාත මගීන් කරච්චි, ලාහෝර් සහ ඉස්ලාමාබාද් යන ගුවන් තොටුපළවල සිරවී සිටිති.
ඇමෙරිකාව සහ ඊශ්රායලය විසින් ඉරානයට එල්ල කරන ලද ප්රහාර සහ ඊට ප්රතිචාර වශයෙන් ඉරානය විසින් ගල්ෆ් කලාපයේ ඇමෙරිකානු කඳවුරු සහ ඊශ්රායලය ඉලක්ක කර එල්ල කරන මිසයිල ප්රහාර හේතුවෙන් මැදපෙරදිග රටවල් 9ක (ඉරානය, එක්සත් අරාබි එමීර් රාජ්යය, කටාර්, බහරේන්, කුවේට්, ඉරාකය, සිරියාව, ජෝර්දානය සහ ඊශ්රායලය) ගුවන් කලාප සම්පූර්ණයෙන්ම හෝ අර්ධ වශයෙන් වසා දමා තිබීම මෙලෙස පාකිස්ථාන ගුවන් ගමන් අත්හිටුවීමට ප්රධානතම හේතුව වී තිබේ.
දැනට පවතින තත්ත්වය අනුව සවුදි අරාබිය වෙත යන ගුවන් ගමන් පමණක් යම් මට්ටමකට ක්රියාත්මක වන අතර, අනෙකුත් සියලුම ගල්ෆ් කලාපීය ගුවන් ගමන් දැඩි අවදානමකට ලක්ව ඇත. මෙම තත්ත්වය ලෝක වෙළඳපොළේ ගුවන් ටිකට්පත් මිල ඉහළ යාමට සහ ගුවන් ගමන් කාලය දීර්ඝ වීමට ද සෘජුවම බලපානු ඇත.
