කොළඹ කොටස් වෙළෙඳපොළ (CSE) ඉතිහාසයේ එක් දිනක් තුළ වාර්තා වූ ඉහළම ඒකක සංඛ්යාවක පහත වැටීම අද (03) වාර්තා විය. සමස්ත මිල දර්ශකය (ASPI) ඒකක 1,290.68කින් හෙවත් 5.44%ක දැවැන්ත අගයකින් පහත වැටුණු අතර, දිනය අවසානයේදී එය ඒකක 22,443.38ක් ලෙස සටහන් විය. මැදපෙරදිග කලාපයේ පවතින උග්ර යුදමය වාතාවරණය සහ ඉන් මෙරට ආර්ථිකයට මෙන්ම ගුවන් සේවා ක්ෂේත්රයට එල්ල වී ඇති බලපෑම ආයෝජකයන්ගේ දැඩි කනස්සල්ලට හේතු වී තිබේ.
අද දින ගනුදෙනු අවසානයේ වෙළෙඳපොළ පිරිවැටුම රුපියල් බිලියන 9.56ක් ලෙස වාර්තා වූ අතර, ප්රධාන පෙළේ සමාගම් රැසක කොටස් මිල ගණන් සීඝ්රයෙන් පහත වැටීම මෙයට හේතු විය. විශේෂයෙන්ම මැදපෙරදිග කලාපයේ පවතින අස්ථාවරත්වය හේතුවෙන් ගෝලීය බලශක්ති මිල ඉහළ යාම සහ ශ්රී ලංකාවේ සංචාරක කර්මාන්තයට එල්ල විය හැකි බාධා පිළිබඳව ඇති වූ බිය ආයෝජකයන් සිය කොටස් අලෙවි කිරීමට (Panic Selling) පෙළඹවීමට ප්රධාන සාධක වී ඇත.
පසුගිය දින කිහිපය පුරාම මැදපෙරදිග අර්බුදය හේතුවෙන් ගුවන් ගමන් අවලංගු වීම් සහ ගෝලීය වෙළෙඳපොළ අස්ථාවර වීම් වාර්තා වූ අතර, එහි සෘජු ප්රතිඵලයක් ලෙස කොළඹ කොටස් වෙළෙඳපොළ මෙලෙස කඩා වැටීමට ලක් විය. මීට පෙර පැවති දරුණුතම පසුබෑම් පවා අභිබවා යමින් අද දින වාර්තා වූ මෙම පහත වැටීම ශ්රී ලංකාවේ මූල්ය වෙළෙඳපොළ තුළ දැඩි කම්පනයක් ඇති කිරීමට සමත්ව තිබේ.
