දික්ඔය – ක්ලැගන් මූලික රෝහලේ මෘත ශරීරාගාරයේ තැන්පත් කර තිබූ තරුණියකගේ මළසිරුරකට එම රෝහලේම සේවකයින් තිදෙනෙකු විසින් ලිංගික අපහාසයක් සිදුකළ බවට චෝදනා කරමින් අද (මාර්තු 03) රෝහල ඉදිරිපිට දැඩි විරෝධතාවක් පවත්වා තිබේ.
පසුගිය පෙබරවාරි 25 වනදා හැටන් – ඇබොට්ස්ලි වතුයායේ පදිංචි 23 හැවිරිදි තරුණියක සියදිවි හානිකරගෙන ඇති අතර, ඇයගේ පශ්චාත් මරණ පරීක්ෂණ කටයුතු සඳහා සිරුර එදිනම දික්ඔය රෝහලේ මෘත ශරීරාගාරයට භාර දී ඇත. එම සිරුරට රෝහලේ සුළු සේවකයින් තිදෙනෙකු විසින් ලිංගික අපහාසයක් සිදුකළ බවට තොරතුරු අනාවරණය වීමත් සමඟ ඇයගේ ඥාතීන් සහ ප්රදේශවාසීන් අද රෝහල ඉදිරිපිට රැස්වී වැරදිකරුවන් වහාම අත්අඩංගුවට ගන්නා ලෙස බලකරමින් විරෝධතාවයේ නිරත විය.
මේ සම්බන්ධයෙන් අදහස් දැක්වූ වෛද්ය නිලධාරී වෛද්ය බෂ්ලි මහතා සඳහන් කළේ, සිරුර තැන්පත් කර තිබූ ආකාරය පිළිබඳව ලද පැමිණිලි මත මෘත ශරීරාගාරයේ CCTV දර්ශන පරීක්ෂා කළ බවයි. එහිදී සේවකයින් තිදෙනෙකු අනවශ්ය ලෙස මෘත ශරීරාගාරයට ඇතුළු වී ඇති ආකාරය නිරීක්ෂණය වූ බවත්, ඒ සම්බන්ධයෙන් අභ්යන්තර පරීක්ෂණයක් ආරම්භ කර ඇති බවත් ඔහු පැවසීය.
සැකකරුවන්ට එරෙහිව දැඩි නීතිමය පියවර ගන්නා ලෙස ජනතාව පොලිසියෙන් ඉල්ලා සිටින අතර, හැටන් පොලිසිය මේ පිළිබඳව වැඩිදුර විමර්ශන මෙහෙයවයි.
