ඇමෙරිකාව සහ ඊශ්රායලය එක්ව ඉරානයට එල්ල කළ ප්රහාරවලින් ඇරඹී, මේ වන විට ලෙබනනය සහ ගල්ෆ් කලාපීය රටවල් දක්වා ව්යාප්ත වී ඇති යුද්ධය හේතුවෙන් ඉන්දීය ආර්ථිකයට බරපතළ හානි සිදුවිය හැකි බව ඉන්දීය විදේශ කටයුතු අමාත්යාංශය අද (මාර්තු 03) විශේෂ ප්රකාශයක් නිකුත් කරමින් අනාවරණය කළේය.
ගල්ෆ් කලාපය තුළ ඉන්දියානු ශ්රමිකයන් කෝටියකට (මිලියන 10ක්) ආසන්න පිරිසක් සේවය කරන අතර, ඔවුන්ගේ ආරක්ෂාව සහ සුබසාධනය ඉන්දියාවේ ප්රධානතම ප්රමුඛතාවයයි. මැදපෙරදිග කලාපය හරහා ඉන්දියාවේ ප්රධාන වෙළඳ සහ බලශක්ති සැපයුම් මාර්ග (තෙල් සහ ගෑස්) වැටී ඇති බැවින්, මෙම කලාපයේ සිදුවන ඕනෑම බාධාවක් ඉන්දීය ආර්ථිකය දැඩි අර්බුදයකට ඇද දැමීමට සමත් වේ.
විශේෂයෙන්ම රමසාන් උත්සව සමය පවතින මේ වකවානුවේදී තත්ත්වය තවදුරටත් උග්ර වීම කනගාටුදායක බව ඉන්දියාව පවසයි. පසුගිය දින කිහිපය තුළ වෙළඳ නෞකාවලට එල්ල වූ ප්රහාර හේතුවෙන් ඉන්දියානු ජාතිකයින් කිහිප දෙනෙකු මියගොස් හෝ අතුරුදන් වී ඇති බවත්, නාවික ගමනාගමනයට එල්ල වන මෙවැනි ප්රහාර ඉන්දියාව දැඩි ලෙස හෙළා දකින බවත් එම නිවේදනයේ සඳහන් වේ. කලාපීය ස්ථාවරත්වය පිළිබඳව දැඩි උනන්දුවක් දක්වන සමීපතම අසල්වැසියෙකු ලෙස ඉන්දියාව මෙම වර්ධනයන් පිළිබඳව පසුවන්නේ දැඩි කනස්සල්ලකිනි.
