මැදපෙරදිග කලාපයේ පවතින උග්ර යුදමය තත්ත්වය හේතුවෙන් ශ්රී ලංකාවේ සිට විදේශ රටවලට යවනු ලබන පාර්සල් සහ තැපැල් සේවාවන්ට දැඩි බාධා එල්ල වී ඇති බව තැපැල්පති රුවන් සත්කුමාර මහතා පවසයි. මැදපෙරදිග ගමනාන්ත වෙත සිදුකරන ගුවන් ගමන් වාර රැසක් අවලංගු වීම මීට සෘජුවම බලපා ඇති අතර, මේ හේතුවෙන් ජාත්යන්තර තැපැල් හුවමාරුවේදී විශාල ප්රමාදයන් සහ බාධා මතුව තිබේ. විශේෂයෙන්ම පසුගිය සිකුරාදා දින භාරගත් තැපැල් පාර්සල් තොග රැසක් ගුවන් ගමන් තහනම් සහ මෙහෙයුම් සීමා නිසා මෙතෙක් පිටත් කර යැවීමට නොහැකි වී ඇති බව තැපැල්පතිවරයා වැඩිදුරටත් සඳහන් කළේය.
පවතින අනාරක්ෂිත වාතාවරණය හමුවේ අදාළ රටවල තැපැල් පරිපාලන ආයතන සමඟ සම්බන්ධීකරණය වෙමින් කටයුතු කරන බව පවසන බලධාරීන්, තත්ත්වය සමනය වන තෙක් ජාත්යන්තර තැපැල් සේවා ප්රමාද විය හැකි බවට මහජනතාවට දැනුම් දෙයි. විශේෂයෙන්ම ඉක්මනින් නරක් වන ද්රව්ය හෝ කාලානුරූපීව වැදගත් වන පාර්සල් යැවීමේදී මෙම ප්රමාදයන් නිසා දැඩි අවදානමක් පවතින බව ද මෙහිදී අවධාරණය කෙරිණි. මෙම අර්බුදය ශ්රී ලංකාවට පමණක් නොව, මැදපෙරදිග හරහා ගුවන් ගමන් සිදුකරන සෙසු රටවලට ද පොදුවේ බලපා තිබේ.
