ප්රිමියර් ලීග් පාපන්දු තරගාවලියේ ලිවර්පූල් කණ්ඩායම සහ වුල්ව්ස් කණ්ඩායම අතර පැවැති තීරණාත්මක තරගයෙන් ලිවර්පූල් පිල ගෝල 2-1ක් ලෙස පරාජයට පත්වීමත් සමඟ ඔවුන්ගේ ශූරතා බලාපොරොත්තු දැඩි අභියෝගයකට ලක්ව තිබෙනවා. තරගයේ 94 වන මිනිත්තුවේදී වුල්ව්ස් ක්රීඩක ඇන්ඩ්රේ විසින් වාර්තා කළ ජයග්රාහී ගෝලයත් සමඟ ලිවර්පූල් පිලේ කළමනාකරු ආර්න් ස්ලොට් දැඩි කනස්සල්ලට පත්ව සිටින්නේ මෙය තම කණ්ඩායමට එල්ල වූ තවත් එක් විශාල පසුබෑමක් බව පවසමිනුයි. ප්රිමියර් ලීග් ප්රසාද ලකුණු සටහනේ අවසන් ස්ථානයේ පසුවන වුල්ව්ස් කණ්ඩායම හමුවේ මෙලෙස පරාජය වීම ලිවර්පූල් ක්රීඩා ලෝලීන්ගේ ද දැඩි අප්රසාදයට හේතු වී ඇති අතර තරගය නිමවීමට පෙරම ඔවුන් ක්රීඩාංගණයෙන් ඉවත්ව යන අයුරු ද දක්නට ලැබුණා.
මෙම තරග වාරය තුළ ලිවර්පූල් කණ්ඩායම අතිරේක කාලය තුළ ගෝල ලබා දෙමින් පරාජයට පත්වූ පස්වන අවස්ථාව මෙය වන අතර එය ප්රිමියර් ලීග් ඉතිහාසයේ කණ්ඩායමක් එක් තරග වාරයකදී වාර්තා කළ ඉහළම අගය ලෙස ද සටහන් වනවා. ලිවර්පූල් නායක වර්ජිල් වැන් ඩයික් පවසන්නේ තම කණ්ඩායමේ මන්දගාමී ක්රීඩා විලාසය සහ පන්දු පාලනයේ පවතින දුර්වලතා මෙම පරාජයට සෘජුවම බලපෑ බවයි. ඉදිරි තරග නවය ලිවර්පූල් පිලට ඉතා තීරණාත්මක වන අතර ලබන වසරේ ශූරයන්ගේ ලීග් (Champions League) වරම් අහිමි වීමේ අවදානම ද මේ වන විට ඔවුන් හමුවේ මතුව තිබෙනවා.
