අතිශය ආන්දෝලනාත්මක ලිංගික අපරාධ චෝදනාවලට වරදකරු වී වසර හතරකට අධික සිරදඬුවමක් විඳිමින් සිටින ප්රකට රැප් ගායක ෂෝන් ‘ඩිඩී’ කොම්බ්ස් (Sean ‘Diddy’ Combs) සම්බන්ධයෙන් නවතම තොරතුරක් අනාවරණය වී තිබේ. අමෙරිකානු ෆෙඩරල් බන්ධනාගාර කාර්යාංශයේ (BOP) නිල දත්තවලට අනුව, ඔහුගේ සිරදඬුවම් කාලය මාසයකට අධික කාලයකින් අඩු කර ඇති අතර, ඒ අනුව ඔහු 2028 අප්රේල් 25 වැනිදා නිදහස් කිරීමට නියමිතය. මීට පෙර ඔහු නිදහස් කිරීමට නියමිතව තිබුණේ 2028 ජූනි 04 වැනිදාය.දැනට 56 වැනි වියේ පසුවන මෙම සංගීත ප්රභූවරයා නිව් ජර්සිහි ෆෝර්ට් ඩික්ස් (Fort Dix) ෆෙඩරල් බන්ධනාගාරයේ රඳවා සිටී. ඔහුගේ සිරදඬුවම් කාලය මෙලෙස කෙටි වීමට ප්රධානතම හේතුව වී ඇත්තේ ඔහු එහි පවත්වාගෙන යනු ලබන නේවාසික මත්ද්රව්ය පුනරුත්ථාපන වැඩසටහනට (RDAP) සක්රීයව දායක වීමයි. මෙම වැඩසටහන සාර්ථකව අවසන් කරන රැඳවියන්ගේ සිරදඬුවම් කාලය වසරක් දක්වා අඩු කිරීමට නීතිමය ප්රතිපාදන පවතී. ඩිඩීගේ නියෝජිතයෙකු සඳහන් කළේ ඔහු මෙම පුනරුත්ථාපන ක්රියාවලිය ඉතා බැරෑරුම් ලෙස සලකා කටයුතු කරන බවයි.
මේ අතර, ඩිඩී විසින් ජනාධිපති ඩොනල්ඩ් ට්රම්ප් වෙත පුද්ගලික ලිපියක් යොමු කරමින් තමන්ට ජනාධිපති සමාව (Pardon) ලබා දෙන ලෙස ඉල්ලා තිබුණි. කෙසේ වෙතත්, ඒ පිළිබඳව මාධ්ය වෙත අදහස් දක්වමින් ජනාධිපති ට්රම්ප් මීට පෙර පවසා තිබුණේ ඩිඩී තමන් සමඟ සමීප සබඳතාවක් පැවැත්වූව ද, තමන් මැතිවරණයට ඉදිරිපත් වූ අවස්ථාවේදී ඔහු දැක්වූ සතුරු ආකල්ප නිසා මෙලෙස සමාව දීම පිළිබඳ තීරණ ගැනීම “ඉතා අපහසු” කටයුත්තක් බවයි. කෙසේ වෙතත්, කරුණු සොයා බලා සාධාරණ තීරණයක් ගන්නා බව ද ජනාධිපතිවරයා වැඩිදුරටත් ඉඟි කර තිබුණි.
