අග්රාමාත්ය ආචාර්ය හරිනි අමරසූරිය සහ ආසියානු සංවර්ධන බැංකුවේ (ADB) නිලධාරීන් අතර විශේෂ හමුවක් අද (04) පෙරවරුවේ අධ්යාපන අමාත්යාංශයේදී පැවැත්විණි. අධ්යාපනය සඳහා මානව සම්පත් සංවර්ධන ව්යාපෘතිය (HRDEP) යටතේ මෙරට අධ්යාපන ක්ෂේත්රයේ සිදු කිරීමට නියමිත ප්රතිසංස්කරණ පිළිබඳව මෙහිදී දීර්ඝ වශයෙන් සාකච්ඡා කෙරිණි. ජ්යෙෂ්ඨ ද්විතීයික අධ්යාපනයේ ගුණාත්මකභාවය ඉහළ නැංවීම, ගුරු ශ්රම බලකාය ශක්තිමත් කිරීම සහ අධ්යාපන ක්ෂේත්රයේ කළමනාකරණය විධිමත් කිරීම කෙරෙහි මෙහිදී ප්රධාන අවධානය යොමු වූ බව අග්රාමාත්ය මාධ්ය අංශය සඳහන් කරයි.
අධ්යාපන ක්ෂේත්රය ඩිජිටල්කරණය කිරීමේ ක්රියාවලියේදී තාක්ෂණික ධාරිතාව වර්ධනය කිරීමේ සහ දක්ෂ මානව සම්පත් බිහි කිරීමේ අවශ්යතාව අග්රාමාත්යවරිය මෙහිදී අවධාරණය කළාය. රටේ ජාතික සංවර්ධනයට නායකත්වය දිය හැකි ශක්තිමත් මානව ප්රාග්ධනයක් ගොඩනැගීම රජයේ අවසන් ඉලක්කය බව ඇය මෙහිදී පෙන්වා දුන්නාය. වර්තමාන රජය අධ්යාපන පද්ධතියේ පවතින ගැටලුවලට සමස්ත විසඳුමක් ලබා දීමට (Comprehensive system development) කැපවී සිටින බව ද ඇය වැඩිදුරටත් ප්රකාශ කළාය.
රජය ගෙන යන මෙම අධ්යාපන ප්රතිසංස්කරණ ක්රියාවලිය සඳහා අවශ්ය තාක්ෂණික විශේෂඥ දැනුම සහ ජාත්යන්තර මූල්ය පහසුකම් ලබා දීමට ආසියානු සංවර්ධන බැංකුව මෙහිදී සිය එකඟතාව පළ කර තිබේ. අධ්යාපන ක්ෂේත්රයේ ප්රගතිය වෙනුවෙන් අඛණ්ඩව සහයෝගය ලබා දීමට සූදානම් බව ද එම බැංකු නිලධාරීන් මෙහිදී සහතික විය. මෙම සාකච්ඡාව සඳහා අධ්යාපන අමාත්යාංශයේ ලේකම් නාලක කළුවැව මහතා ඇතුළු උසස් නිලධාරීන් සහ තාක්ෂණික විශේෂඥයන් පිරිසක් සහභාගී වූහ.
