අමෙරිකාව සහ ඉශ්රායලය එක්ව ඉරානයට එරෙහිව දියත් කර ඇති යුද මෙහෙයුම ජාත්යන්තර නීතිය උල්ලංඝනය කිරීමක් බව පවසමින් චීනය, දකුණු අප්රිකාව සහ බ්රසීලය ඇතුළු දකුණු අර්ධගෝලයේ (Global South) රටවල් රැසක් සිය විරෝධය පළ කර තිබේ. ස්වෛරී රාජ්යයක නායකයෙකු “නිර්ලජ්ජිත ලෙස ඝාතනය කිරීම” කිසිසේත්ම පිළිගත නොහැකි බව චීනය අවධාරණය කරන අතර, මෙම ප්රහාරය සාකච්ඡා මාර්ගයෙන් විසඳුම් සෙවීමේ අවස්ථාවන් අහුරා දමා ඇති බව බොහෝ රටවල මතය වී ඇත.
පකිස්ථාන අගමැති ෂෙහ්බාස් ෂරීෆ්, ඉරාන උත්තරීතර නායක අයතුල්ලා අලි කමේනිගේ මරණය සම්බන්ධයෙන් සිය ශෝකය පළ කරමින් කියා සිටියේ රාජ්ය නායකයන් ඉලක්ක කිරීම ජාත්යන්තර නීතියට පටහැනි බවයි. දකුණු අප්රිකානු ජනාධිපති සිරිල් රමෆෝසා ද මෙම “පූර්වභංග” (Pre-emptive) ප්රහාරය සාධාරණීකරණය කිරීම ප්රශ්න කර ඇති අතර, දේශපාලන ගැටලුවලට හමුදාමය විසඳුම් සෙවිය නොහැකි බව පවසා සිටියේය. ඕමානය ද අමෙරිකාවට අනතුරු අඟවමින් කියා සිටියේ මෙම අනවශ්ය යුද්ධය තුළට තවදුරටත් ඇදී නොයන ලෙසයි.
විශ්ලේෂකයන් පෙන්වා දෙන්නේ මෙම ගැටුම ඉරාකය සහ ලිබියාව වැනි රටවල සිදුකළ “පාලන තන්ත්රය වෙනස් කිරීමේ” පැරණි අධිරාජ්යවාදී උපායමාර්ගයේම දිගුවක් බවයි. දකුණු අප්රිකාවේ ජොහැන්නස්බර්ග් විශ්වවිද්යාලයේ මහාචාර්ය සිපමන්ඩ්ලා සොන්ඩි පවසන පරිදි, මෙය හුදෙක් බලය පෙන්වන යුද්ධයක් වන අතර එමගින් මුළු ලෝකයම අනාරක්ෂිත තත්ත්වයකට පත්වේ. බටහිර රටවල් අමෙරිකාව සම්බන්ධ කාරණාවලදී දක්වන මෘදු ප්රතිපත්තිය සහ ජාත්යන්තර නීතිය ක්රියාත්මක කිරීමේදී පෙන්වන ද්විත්ව ප්රමිතිය ද මෙහිදී දැඩි විවේචනයට ලක් විය.
ලතින් ඇමෙරිකානු රටවල් තුළ ද මෙම යුද්ධය පිළිබඳව දැඩි බියක් හටගෙන ඇත්තේ, වෙනිසියුලාවේ මදුරෝ සහ ඉරානයේ කමේනි ඉලක්ක කළ ආකාරයටම ජනාධිපති ට්රම්ප් මීළඟට කියුබාව ඉලක්ක කරනු ඇතැයි යන සැකය හේතුවෙනි. හිටපු පකිස්ථාන තානාපතිනී මලීහා ලෝධි පවසන්නේ අමෙරිකාව ඉරානය සමඟ සාකච්ඡා කළේ හුදෙක් ප්රහාරයට සූදානම් වීම සඳහා කාලය ලබා ගැනීමට බවයි. මෙම තත්ත්වය හමුවේ අමෙරිකානු පරිපාලනය කෙරෙහි පවතින විශ්වාසය මුළුමනින්ම බිඳවැටී ඇති බවත්, එය අනාගතයේදී අමෙරිකාවටම අවාසිදායක වනු ඇති බවත් විචාරකයෝ පවසති.
