මැදපෙරදිග කලාපයේ පවතින උග්ර යුදමය තත්ත්වය හමුවේ ලොව ප්රධානතම තෙල් ප්රවාහන මාර්ගයක් වන හෝමූස් සමුද්ර සන්ධිය (Strait of Hormuz) වසා දමා ඇති බවට ඉරාන ඉස්ලාමීය විප්ලවීය ආරක්ෂක බලකාය (IRGC) විසින් නිල වශයෙන් ප්රකාශ කර තිබේ. ඇමෙරිකාව සහ ඉශ්රායලය එක්ව පසුගියදා ඉරානයට එල්ල කළ ප්රහාරවලට ප්රතිචාර වශයෙන් ඉරානය මෙම පියවර ගෙන ඇති අතර, එම මුහුදු මාර්ගය හරහා ගමන් කිරීමට උත්සාහ කරන ඕනෑම නෞකාවක් මිසයිල හෝ ඩ්රෝන ප්රහාර එල්ල කර ගිනිබත් කරන බවට ද ඔවුන් දැඩි අනතුරු ඇඟවීමක් නිකුත් කර ඇත. ඉරාන ආරක්ෂක අංශවල ජ්යෙෂ්ඨ උපදේශක එබ්රහීම් ජබාරි පවසන්නේ සමුද්ර සන්ධිය මේ වන විට ඔවුන්ගේ පූර්ණ පාලනය යටතේ පවතින බවත්, එය උල්ලංඝනය කරන ඕනෑම නෞකාවකට එරෙහිව සිය නාවික හමුදාව සූදානමින් සිටින බවත්ය.
මෙම අවහිර කිරීම් හේතුවෙන් හෝමූස් සමුද්ර සන්ධිය හරහා ගමන් කළ නොහැකිව එක්සත් අරාබි එමීර් රාජ්යයේ ෆුජයිරා වෙරළට ඔබ්බෙන් තෙල් නැව් සහ භාණ්ඩ ප්රවාහන නෞකා සිය ගණනක් පෝලිම් ගැසී නතර කර ඇති ආකාරය දැක්වෙන වීඩියෝවක් මේ වන විට සමාජ මාධ්ය ඔස්සේ සීඝ්රයෙන් පැතිර යමින් පවතී. යුදමය තත්ත්වය නිසා මෙම මුහුදු මාර්ගයේ නෞකා ගමනාගමනය 94%කින් පමණ අඩාල වී ඇති බව වාර්තා වන අතර, මෙය ගෝලීය බලශක්ති සැපයුමට විශාල තර්ජනයක් වී තිබේ. ලෝකයේ තෙල් පරිභෝජනයෙන් 20%ක් පමණ ප්රවාහනය කෙරෙන මෙම උපායමාර්ගික මාවත අවහිර වීම නිසා ලෝක වෙළඳපොළේ බොරතෙල් මිල ද සීඝ්රයෙන් ඉහළ යමින් පවතින බව විදෙස් මාධ්ය පෙන්වා දෙයි.
