ගාල්ල වරායට නාවික සැතපුම් 40ක් පමණ දුරින් වූ මුහුදු ප්රදේශයේදී ඉරාන නාවික හමුදාවට අයත් ‘IRIS Dena’ නමැති නෞකාව දරුණු අනතුරකට ලක්ව ඇති බව විදේශ කටයුතු අමාත්ය විජිත හේරත් මහතා අද (04) පාර්ලිමේන්තුවේදී තහවුරු කළේය. අමාත්යවරයා වැඩිදුරටත් අනාවරණය කළේ අනතුර සිදුවන අවස්ථාවේදී එම නෞකාවේ 180 දෙනෙකුගෙන් යුත් පිරිසක් සිට ඇති බවයි. විපක්ෂ නායක සජිත් ප්රේමදාස මහතා යොමු කළ ප්රශ්නයකට පිළිතුරු දෙමින් අමාත්යවරයා පැවසුවේ, මෙම අනතුර ශ්රී ලංකාවට අයත් මුහුදු සීමාවෙන් බැහැරව සිදුවුවද, ජාත්යන්තර නීතියට අනුව ආසන්න මුහුදේ සිදුවන මෙවැනි අනතුරකදී සහය වීම ශ්රී ලංකාවේ වගකීමක් බවයි.
අනතුරට පත් නෞකාවේ සිටි පිරිස බේරා ගැනීම සඳහා ශ්රී ලංකා නාවික හමුදාව වහාම ක්රියාත්මක වී ඇති අතර, මේ වන විට පුද්ගලයන් 35 දෙනෙකු සාර්ථකව බේරා ගැනීමට සමත්ව තිබේ. බේරාගත් එම පිරිස ප්රතිකාර සඳහා ගාල්ල කරාපිටිය ශික්ෂණ රෝහල වෙත රැගෙන එමින් පවතින බව ආරක්ෂක අමාත්යාංශය නිවේදනය කළේය. නෞකාව අනතුරට ලක්වූ මුහුදු ප්රදේශයේ තවදුරටත් සිටිය හැකි පිරිස් සෙවීම සඳහා ශ්රී ලංකා ගුවන් හමුදාවට අයත් විශේෂ නිරීක්ෂණ ගුවන් යානයක් ද එම ප්රදේශය වෙත යොමු කර තිබේ.
