මැදපෙරදිග කලාපයේ පවතින උග්ර යුදමය තත්ත්වය හමුවේ අවදානමට ලක්ව සිටින ශ්රී ලාංකිකයන් මෙරටට ගෙන්වා ගැනීම සඳහා විශේෂ ගුවන් යානා යොමු කිරීමට රජය කටයුතු කරමින් සිටින බව විදේශ අමාත්ය විජිත හේරත් මහතා අද (04) පාර්ලිමේන්තුවේදී ප්රකාශ කළේය. මේ වන විට ලක්ෂ 10කට අධික ශ්රී ලාංකික පිරිසක් මැදපෙරදිග රැකියාවල නියුක්තව සිටින අතර, ඔවුන්ගේ ආරක්ෂාව තහවුරු කිරීම රජයේ ප්රමුඛතාව වී තිබේ.
යුදමය වාතාවරණය හේතුවෙන් ඇතැම් ගුවන්තොටුපොළවල් වසා තිබුණ ද, දැනට විවෘතව පවතින ගුවන්තොටුපොළවල් හරහා ගුවන් යානා යොමු කිරීමට විවිධ ගුවන් සමාගම් සමඟ සාකච්ඡා පවත්වමින් සිටින බව අමාත්යවරයා පැවසීය.
පවතින තත්ත්වය සමනය කර ගැනීම සඳහා ජනාධිපතිවරයා ඇතුළු රජය ලෝක නායකයන් සමඟ අඛණ්ඩව සම්බන්ධ වෙමින් සිටී. ඊයේ රාත්රියේදී ජනාධිපතිවරයා එක්සත් අරාබි එමීර් රාජ්යයේ නායකයා සමඟ දුරකථනයෙන් සාකච්ඡා කළ බව ද අමාත්යවරයා අනාවරණය කළේය. එමෙන්ම, හෝමූස් සමුද්ර සන්ධිය වසා දැමීමෙන් ලෝක තෙල් සැපයුමට බලපෑමක් එල්ල වුවද, ශ්රී ලංකාවට තෙල් ආනයනය කරන මාර්ගය වෙනස් බැවින් දැනට මෙරට තෙල් සැපයුමට බාධාවක් නොමැති බව ද ඔහු අවධාරණය කළේය.
ගැටුමට සම්බන්ධ සියලු පාර්ශ්වයන් උපරිම සංයමයකින් කටයුතු කළ යුතු බවත්, සාකච්ඡාමය මාර්ගයෙන් ගැටලුව විසඳා ගත යුතු බවත් ශ්රී ලංකාවේ ස්ථාවරයයි. මෙරට පිහිටි සියලුම තානාපති කාර්යාලවල ආරක්ෂාව ද මේ වන විට තහවුරු කර ඇත.
