ශ්රී ලංකාවේ විදේශ අමාත්ය විජිත හේරත් මහතා අද (04) පස්වරුවේ කොළඹ පිහිටි ඉරාන තානාපති කාර්යාලය වෙත ගොස්, අභාවප්රාප්ත ඉරාන උත්තරීතර නායක අයතුල්ලා අලි කමේනි මහතා වෙනුවෙන් ශ්රී ලංකා රජයේ ශෝකය පළ කළේය. එහිදී තැන්පත් කර තිබූ විශේෂ සමරු පොතේ සටහනක් තබමින් අමාත්යවරයා සඳහන් කළේ, ඉරාන උත්තරීතර නායකයාගේ අභාවය සම්බන්ධයෙන් ඉරාන ඉස්ලාමීය ජනරජය වෙත සිය බලවත් කනගාටුව පළ කරන බවයි.
අමාත්යවරයා වැඩිදුරටත් පෙන්වා දුන්නේ අයතුල්ලා අලි කමේනි මහතාගේ පාලන සමය තුළ ශ්රී ලංකාව සහ ඉරානය අතර පවතින ද්විපාර්ශ්වික සබඳතා ඉතා සැලකිය යුතු මට්ටමකින් පුළුල් වූ බවයි. විශේෂයෙන්ම බලශක්ති, කෘෂිකර්මාන්තය සහ යටිතල පහසුකම් සංවර්ධනය වැනි ක්ෂේත්රවලදී ඉරානය ශ්රී ලංකාවට ලබා දුන් සහයෝගය මෙහිදී ඇගයීමට ලක් විය. “ඉරානය සැමවිටම ශ්රී ලංකාවේ සමීප මිතුරෙකු ලෙස කටයුතු කළ අතර, එම මිත්රත්වය අපි ඉහළින්ම අගය කරනවා. මෙම ශෝකී අවස්ථාවේදී අපගේ ප්රාර්ථනා ඉරාන ජනතාව සමඟ පවතිනවා,” යනුවෙන් අමාත්යවරයා සිය ‘X’ ගිණුමේ ද සටහනක් තබා තිබුණි.
ශ්රී ලංකාව සහ ඉරානය අතර පවතින දීර්ඝකාලීන රාජ්යතාන්ත්රික සබඳතා ශක්තිමත් කිරීමෙහිලා කමේනි මහතා දැක්වූ දායකත්වය අමාත්යවරයා මෙහිදී සිහිපත් කළේය. උමා ඔය බහුකාර්ය ව්යාපෘතිය වැනි දැවැන්ත සංවර්ධන ව්යාපෘති සඳහා ඉරානයේ සහයෝගය ලැබුණේ ද එතුමාගේ පාලන සමය තුළදීය. වත්මන් මැදපෙරදිග අර්බුදය හමුවේ වුවද, දෙරට අතර පවතින සහයෝගිතාව අඛණ්ඩව පවත්වාගෙන යාම රජයේ අපේක්ෂාව බව ද විදේශ අමාත්යවරයා මෙහිදී අවධාරණය කළේය.
