මෝටර් රථ ප්රවාහන දෙපාර්තමේන්තුව යටතේ පවතින ‘වාහන වායු විමෝචන භාරකාර අරමුදල’ (VET Trust Fund) ව්යවස්ථාපිත අරමුදලක් බවට පත් කිරීමට සිදුව ඇති ප්රමාදය හේතුවෙන්, මෙරට වාහන දුම් පරීක්ෂාව සහ ඒ ආශ්රිත වැටලීම් මාස තුනක පමණ කාලයක සිට අක්රීය වී ඇති බව වාර්තා වේ. ප්රවාහන, පරිසර සහ සෞඛ්ය යන අමාත්යාංශ එක්ව ඉදිරිපත් කළ කැබිනට් පත්රිකාවකට පසුගිය 2025 අගෝස්තු 19 වැනිදා අනුමැතිය ලැබුණද, අදාළ නිලධාරීන්ගේ ප්රමාදය නිසා අරමුදල් නිසි ලෙස භාවිත කිරීමට නොහැකි වීම මෙයට ප්රධාන හේතුව වී තිබේ.
මෙම අර්බුදය නිසා මහා මාර්ගවල සිදුවන හදිසි දුම් පරීක්ෂා වැටලීම් සම්පූර්ණයෙන්ම නතර වී ඇති අතර, අධික ලෙස කළු දුම පිටකරන වාහන නිසා පරිසරයට සිදුවන හානිය ශීඝ්රයෙන් ඉහළ ගොස් ඇත. මෝටර් රථ ප්රවාහන දෙපාර්තමේන්තුවේ උසස් නිලධාරියෙකු සඳහන් කළේ අරමුදල් හිඟකම නිසා වැඩකටයුතු ඇණහිට ඇති නමුත්, ත්රිවිධ හමුදාවේ සහය ඇතිව හමුදා වාහන 1,600ක් පමණ මේ වන විට පරීක්ෂා කර ඇති බවයි. විශේෂයෙන්ම මීගමුවේ සිට මාතර දක්වා දකුණු කලාපයේ වායු ගුණත්වය මේ වන විටත් පිරිහෙමින් පවතින බවත්, වාහන දුම පාලනය නොකිරීමෙන් එය ‘අතිශය අහිතකර’ (Unhealthy) මට්ටමකට පත්වීමේ අවදානමක් පවතින බවත් පරිසර විද්යාඥයෝ අනතුරු අඟවති.
