ඉරානය සමඟ පවතින යුදමය වාතාවරණය හමුවේ අමෙරිකානු භූමිය තුළ ප්රහාරයක් එල්ල වීමේ අවදානමක් පවතීදැයි නැගූ ප්රශ්නයකට ජනාධිපති ඩොනල්ඩ් ට්රම්ප් ලබා දුන් “සමහරවිට” (I guess) යන පිළිතුර මේ වන විට දැඩි ආන්දෝලනයකට ලක්ව තිබෙනවා. ‘ටයිම්’ (Time) සඟරාව සමඟ පැවැති සම්මුඛ සාකච්ඡාවකදී ට්රම්ප් සඳහන් කළේ, අමෙරිකානුවන් ඒ පිළිබඳව නිතරම කනස්සල්ලෙන් පසුවන බවත්, යුද්ධයකදී මිනිසුන් මියයාම සාමාන්ය දෙයක් බවත්ය.
“යුද්ධයකට යන විට සමහර මිනිස්සු මැරෙනවා” යනුවෙන් ජනාධිපතිවරයා කළ ප්රකාශය සමාජ මාධ්ය ජාල තුළ දැඩි විවේචනයට බඳුන් වී ඇති අතර, බොහෝ පිරිස් පෙන්වා දෙන්නේ තම දේශපාලන තීරණ වෙනුවෙන් සාමාන්ය වැසියන්ගේ ජීවිත පූජා කිරීමට ඔහු සූදානම් බවයි. මෙම ප්රකාශය නිකුත් වන්නේ ඉරානයට එරෙහි මෙහෙයුම් අතරතුර අමෙරිකානු සෙබළුන් හය දෙනෙකු ජීවිතක්ෂයට පත්ව ඇති බව නිල වශයෙන් තහවුරු වී ඇති පසුබිමක වීම විශේෂත්වයක්.
අමෙරිකානු මධ්යම විධානය (CENTCOM) විසින් ඉරාන නාවික යාත්රාවලට ප්රහාර එල්ල කරන බව නිවේදනය කර ඇති අතර, ඊට ප්රතිචාර වශයෙන් ඉරානය අමෙරිකානු භූමියට ප්රහාර එල්ල කරනු ඇතැයි යන බිය ජනතාව තුළ වර්ධනය වී තිබෙනවා. ජනාධිපතිවරයාගේ මෙම සැහැල්ලු පිළිතුර හේතුවෙන් අමෙරිකානුවන්ගේ ආරක්ෂාව පිළිබඳව පවතින සැකය තවදුරටත් තීව්ර වී ඇති බවයි දේශපාලන විශ්ලේෂකයන් පවසන්නේ.
