පාකිස්ථානය විසින් ඇෆ්ගනිස්ථානයට එල්ල කරන ප්රහාර උත්සන්න කිරීමත් සමඟ දෙරට අතර හටගෙන ඇති යුදමය වාතාවරණය හේතුවෙන් ඇෆ්ගනිස්ථානයේ පුද්ගලයින් 160,000කට අධික පිරිසක් දැඩි කුසගින්නට මුහුණ දී සිටින බව වාර්තා වේ. දේශසීමා ආශ්රිතව සිදුවන ගුවන් ප්රහාර සහ වෙඩි තැබීම් හේතුවෙන් එක්සත් ජාතීන්ගේ ආධාර ආයතනවලට සිය කටයුතු අත්හිටුවීමට සිදුවීම මෙම තත්ත්වය දරුණු වීමට ප්රධාන හේතුව වී ඇත.
මෙම අර්බුදය සම්බන්ධයෙන් ලෝක ආහාර වැඩසටහන (WFP) පවසන්නේ පවතින අනාරක්ෂිත බව නිසා හදිසි ආහාර බෙදාහැරීම් නතර කර ඇති අතර, එය 160,000ක පමණ පිරිසකගේ ජීවිත අවදානමකට ලක් කර ඇති බවයි. නුරිස්තාන්, කුනාර්, කන්දහාර් සහ හෙල්මන්ඩ් ඇතුළු පළාත් රැසක දිස්ත්රික්ක 46කට මෙම ගැටුම්වල සෘජු බලපෑම් එල්ල වී තිබේ. ගැටුම් පවතින ප්රදේශවලින් අඩකට වඩා වැඩි ප්රමාණයක ජනතාව දැනටමත් “හදිසි කුසගින්න මට්ටම්” අත්විඳිමින් සිටින බවත්, පළාත් හතරක බරපතල මන්දපෝෂණ තත්ත්වයක් පවතින බවත් එක්සත් ජාතීන්ගේ සංවිධානය පෙන්වා දෙයි.
මෙම ගැටුම ආරම්භ වූයේ පාකිස්ථානය විසින් ත්රස්තවාදී කඳවුරු ඉලක්ක කරන බව පවසමින් ඇෆ්ගනිස්ථාන දේශසීමාව හරහා එල්ල කළ ගුවන් ප්රහාර සමඟිනි. අද වන විට මෙම ගැටුම හත්වන දිනටත් ක්රියාත්මක වෙමින් පවතින අතර, එය කලාපීය ස්ථාවරත්වයට විශාල තර්ජනයක් වී ඇත.
