මැදපෙරදිග කලාපයේ “Operation Epic Fury” මෙහෙයුම දරුණු වෙමින් පවතින පසුබිමක, බ්රිතාන්යයේ ලන්ඩන් නුවර වෙසෙන යුදෙව් ප්රජාව සහ ඔවුන්ගේ මධ්යස්ථාන පිළිබඳව රහසින් තොරතුරු රැස්කළ බවට සැකකෙරෙන ඉරාන ඔත්තුකරුවන් සිව්දෙනෙකු අද (06) අලුයම අත්අඩංගුවට ගෙන තිබේ. ලන්ඩන් මෙට්රොපොලිටන් පොලිසියේ ත්රස්ත මර්දන ඒකකය විසින් දියත් කරන ලද මෙම විශේෂ මෙහෙයුමේදී බාර්නෙට් (Barnet) සහ වොට්ෆර්ඩ් (Watford) යන ප්රදේශවල පදිංචිව සිටි සැකකරුවන් මෙලෙස කොටුකර ගැනීමට සමත්ව ඇත.
අත්අඩංගුවට ගත් පිරිස අතර එක් ඉරාන ජාතිකයෙකු සහ බ්රිතාන්ය – ඉරාන ද්විත්ව පුරවැසිභාවය හිමි පුද්ගලයින් තිදෙනෙකු සිටින බව ස්කොට්ලන්ඩ් යාඩ් පොලිසිය තහවුරු කරයි. මොවුන් වයස අවුරුදු 22, 40, 52 සහ 55 යන වයස් කාණ්ඩවල පසුවන්නන් වන අතර, විදේශීය බුද්ධි අංශයකට (ඉරානයට) සහය දැක්වීමේ චෝදනාව මත මොවුන්ගෙන් ප්රශ්න කරමින් පවතී. මීට අමතරව, මෙම ඔත්තුකරුවන්ට රැකවරණය දුන් බවට සැකකෙරෙන තවත් පුද්ගලයින් හයදෙනෙකු ද හැරෝ (Harrow) ප්රදේශයේදී අත්අඩංගුවට ගෙන තිබේ.
ත්රස්ත මර්දන ඒකකයේ ප්රධානී හෙලන් ෆ්ලැනගන් (Helen Flanagan) මහත්මිය ප්රකාශ කළේ, මෙය දිගුකාලීන පරීක්ෂණයක ප්රතිඵලයක් ලෙස සිදුකළ වැටලීමක් බවත්, බ්රිතාන්යය තුළ සිදුවන ඕනෑම විදේශීය බලපෑම් සහගත ඔත්තු බැලීම් මැඩලීමට තමන් සීරුවෙන් පසුවන බවත්ය. විශේෂයෙන්ම මැදපෙරදිග පවතින ඉරාන – ඊශ්රායල යුද ගැටුම් හමුවේ බ්රිතාන්යයේ වෙසෙන යුදෙව් ප්රජාව කෙරෙහි ඇතිවිය හැකි තර්ජන පිළිබඳව දැඩි අවධානයක් යොමුකර ඇති බව ද ඇය සඳහන් කළාය. ලන්ඩනයේ වෙම්බ්ලි (Wembley) ඇතුළු ප්රදේශ කිහිපයක තවදුරටත් සෝදිසි මෙහෙයුම් ක්රියාත්මක වේ.
මෙම සිදුවීමත් සමඟ ජාත්යන්තරව ඉරානයට එල්ල වන පීඩනය තවදුරටත් ඉහළ ගොස් ඇති අතර, ඩුබායි සහ දෝහා වැනි නගරවලට එල්ල වූ ප්රහාර මෙන්ම බුෂෙයර් න්යෂ්ටික බලාගාරය ආසන්නයේ සිදුවූ පිපිරීම් ද සමඟ ලෝක දේශපාලනය අතිශය උණුසුම් වී තිබේ. බත්තරමුල්ලේ සීලරතන හිමියන් සහ මහාචාර්ය විජිතපුරේ විමලරතන හිමියන් පෙන්වා දෙන්නේ මෙවැනි ඔත්තු බැලීම් සහ කුමන්ත්රණ නිසා ලෝක සාමයට එල්ල වී ඇත්තේ දැඩි අභියෝගයක් බවයි. විශේෂයෙන්ම මැදපෙරදිග අර්බුදය යුරෝපයේ ආරක්ෂාවට ද බලපෑම් එල්ල කිරීම පිළිබඳව මෙරට ආරක්ෂක අංශ ද දැඩි අවධානයෙන් පසුවන බව වාර්තා වේ.
