ශ්රී ලංකාව මේ වන විට අප කිසිසේත් අපේක්ෂා නොකළ බිහිසුණු යුදමය තත්ත්වයකට මුහුණ දෙමින් සිටින බව මහජන ආරක්ෂක නියෝජ්ය අමාත්ය සුනිල් වටගල මහතා අද (06) පාර්ලිමේන්තුවේදී විශේෂ ප්රකාශයක් කරමින් අවධාරණය කළේය. මෑත ඉතිහාසයේ අන් කවරදාටත් වඩා බිහිසුණු ක්රියාවලියකට රට සාක්ෂි දරමින් සිටින බවත් මීළඟ වින්දිතයා කවුරුන්ද යන්න පවා පුරෝකථනය කළ නොහැකි අනතුරුදායක මට්ටමකට තත්ත්වය උද්ගතව ඇති බවත් ඔහු මෙහිදී පෙන්වා දුන්නේය. පසුගියදා ගාලු මුහුදු සීමාවේදී අනතුරට පත් “අයිරිෂ් ඩෙනා” නෞකාවේ සිද්ධිය මෙහි බරපතළකම මැනවින් විදහා දක්වන ප්රබල නිදසුනක් බව අමාත්යවරයා වැඩිදුරටත් සඳහන් කළේය.
සැතපුම් දහස් ගණනක් ඈතින් සිදුවන යුද ගැටුම්වල සෙවනැලි දේශීයව දැනෙන්නට පටන්ගෙන ඇති බව පවසන ඔහු කරාපිටිය රෝහලට එකවර මෘත ශරීර රැසක් භාර ගැනීමට සිදුවීම හරහා මෙම යුදමය වටපිටාවේ බලපෑම මෙරට ජන ජීවිතයට කවරාකාරයෙන් දැනේදැයි පැහැදිලි කළේය. මෙවැනි හදිසි තත්ත්වයන් කවදා කොහොම කොයි ආකාරයෙන් තව කාට භාර ගැනීමට සිදුවේදැයි අනුමාන කළ නොහැකි බැවින් ඒ සඳහා රටක් ලෙස පූර්ව ආරක්ෂක උපක්රම භාවිත කිරීමේ දැඩි අවශ්යතාවයක් පවතින බව ඔහු අවධාරණය කළේය.
රට තුළ හදිසි නීතිය ක්රියාත්මක කිරීමේ වැදගත්කම පිළිබඳව අදහස් දක්වමින් නියෝජ්ය අමාත්යවරයා කියා සිටියේ හදිසි නීතිය පැනවීමෙන් පමණක් “අයන් ඩෝම්” වැනි මිසයිල ආරක්ෂණ පද්ධතියක් රටට නොලැබෙන නමුත් පවතින ඕනෑම අවදානමකට හැකි උපරිමයෙන් සූදානම් වීමට එමගින් අවස්ථාව සැලසෙන බවයි. මෙම යුද්ධයේ බලපෑම නිසා කරාපිටිය රෝහල වැනි ස්ථාන පවා මෘත ශරීරවලින් පිරී යාමට ගතවන්නේ ඉතා කෙටි කාලයක් බැවින් රටේ ආරක්ෂාව වෙනුවෙන් පූර්ව සූදානම සහ ආරක්ෂිත පියවර ගැනීම අතිශය තීරණාත්මක බව ඔහු පාර්ලිමේන්තුවට අවධාරණය කළේය.
