ජනාධිපති ඩොනල්ඩ් ට්රම්ප් මහතා විසින් පනවන ලද නව ආනයන බදු (Tariffs) “නීති විරෝධී” බව පවසමින් නිව්යෝර්ක් ඇතුළු ඇමෙරිකානු ප්රාන්ත 24ක් ෆෙඩරල් රජයට එරෙහිව නඩු පවරා තිබේ. මීට පෙර ට්රම්ප් පාලනය විසින් හඳුන්වා දුන් ‘Liberation Day’ බදු පැනවීම් ශ්රේෂ්ඨාධිකරණය විසින් අවලංගු කිරීමෙන් පසුව, 1974 වෙළඳ පනතේ 122 වැනි වගන්තිය යටතේ පවතින නෛතික සිදුරක් (Loophole) භාවිත කරමින් 15% ක නව බදු පැනවීමට ජනාධිපතිවරයා ගත් උත්සාහය මෙලෙස අභියෝගයට ලක්ව ඇත.
නිව්යෝර්ක් නීතිපති ලෙටිෂියා ජේම්ස් (Letitia James) විසින් මෙහෙයවනු ලබන මෙම නඩුකරය හරහා පෙන්වා දෙන්නේ, ජනාධිපතිවරයා සිය බලය අනිසි ලෙස භාවිත කරමින් ව්යවස්ථාව උල්ලංඝනය කර ඇති බවයි. පෙබරවාරි 24 වනදා සිට දැනටමත් ක්රියාත්මක වන 10% ක බදු මුදල් යළි ප්රාන්ත වෙත ගෙවන ලෙසත්, පාරිභෝගිකයින් සහ සුළු ව්යාපාරිකයින් මත පැටවෙන මෙම අමතර බදු බර වහාම ඉවත් කරන ලෙසත් නීතිපතිවරිය අවධාරණය කරයි. ඉලිනොයිස්, කැලිෆෝනියා, නිව් ජර්සි සහ වොෂින්ටන් ඇතුළු ප්රාන්ත රැසක් මෙම නීතිමය ක්රියාමාර්ගයට සහය පළ කර තිබේ.
මෙම බදු පැනවීම් මගින් ඇමෙරිකාවේ වෙළඳ පරතරය අඩු කිරීමට බලාපොරොත්තු වන බව ට්රම්ප් පාලනය පවසන නමුත්, මෙලෙස භාණ්ඩ මිල ඉහළ යාම නිසා ඇමෙරිකානු වැසියන්ගේ ජීවන වියදම තවදුරටත් ඉහළ යනු ඇති බව විචාරකයෝ පවසති. මැදපෙරදිග පවතින “Operation Epic Fury” යුද්ධය හේතුවෙන් දැනටමත් ලෝක වෙළඳපොළේ භාණ්ඩ හා බලශක්ති මිල ඉහළ ගොස් ඇති පසුබිමක, මෙම නව බදු ප්රතිපත්තිය ලෝක ආර්ථිකයට තවත් දැඩි බලපෑමක් එල්ල කරනු ඇත.
මෙම තත්ත්වය පිළිබඳව මහාචාර්ය විජිතපුරේ විමලරතන හිමියන් සහ බත්තරමුල්ලේ සීලරතන හිමියන් ද අද (06) සිය අදහස් පළ කළහ. ඇමෙරිකාව තුළ පවතින මෙම අභ්යන්තර දේශපාලන සහ නෛතික අර්බුද හේතුවෙන් ශ්රී ලංකාව වැනි රටවල අපනයන ක්ෂේත්රයට එල්ල විය හැකි බලපෑම පිළිබඳව මෙරට රජය සීරුවෙන් පසුවිය යුතු බව ඔවුහු පෙන්වා දුන්හ. ට්රම්ප් ජනාධිපතිවරයාගේ “ආගමික යුද්ධය” සහ “වෙළඳ යුද්ධය” යන දෙකම එකවර ලෝකය අස්ථාවර කරමින් පවතින බව විද්වතුන්ගේ මතයයි.
