පේරාදෙණිය විශ්වවිද්යාලයේ පශු වෛද්ය පීඨයට වසර දහයකට අධික කාලයක් නිහඬ සේවාවක් ඉටුකළ ‘හාමිනා’ නමැති සුනඛ දේනුව පසුගියදා දෑස් පියා ගත්තාය. 2016 වසරේදී පාදයක ආබාධයකට ප්රතිකාර ලබාදීමට පීඨය වෙත රැගෙන ආ ඇය, එතැන් පටන් පීඨයම තම නිවස කරගනිමින් අනාගත පශු වෛද්යවරුන් දහස් ගණනකගේ පළමු ප්රායෝගික ගුරුවරිය බවට පත්වූවාය. වෘත්තීය පශු වෛද්යවරයකු වීමේ සිහිනය ඇතිව පීඨයට පැමිණෙන නවක සිසුන්ගේ චකිතය මකා දමමින්, පරීක්ෂණ සඳහා ඇය දැක්වූ අසීමිත ඉවසීම සැබවින්ම පුදුම සහගතය.
එන්නත් ලබාදීම, රුධිර සාම්පල ගැනීම සහ විවිධ වෛද්ය පරීක්ෂණ සඳහා ඇය සිය සිරුර පූජා කළේ කිසිදු දිනෙක ශිෂ්යයකුට රිදවීමට උත්සාහ නොකරමිනි. පීඨයේ විභාග කටයුතුවලදී පවා සිසුන්ට මහත් මානසික සහනයක් වූ ඇය, තවත් සතුන්ගේ ජීවිත බේරාගැනීම සඳහා අවස්ථා ගණනාවකදී රුධිරය ද පරිත්යාග කර තිබේ. පීඨයේ සිසුන් මෙන්ම ආචාර්ය මණ්ඩලය ද ඇය සැලකුවේ හුදෙක් සතෙකු ලෙස නොව, ඉගෙනුම් ක්රියාවලියේ ප්රධානතම සහකාරියක ලෙසිනි.
හාමිනාගේ නික්මයාම පේරාදෙණියෙන් බිහි වූ වර්තමාන සහ අතීත පශු වෛද්යවරුන්ගේ දෙනෙත් කඳුළින් තෙත් කළ සංවේදී පුවතක් බවට පත්ව ඇත. සැබෑ ජීවකයන් බිහි කිරීමට සිය ජීවිතයම කැපකළ ඇය, අවසානයේ තමන් අතින් පුහුණුව ලැබූ වෛද්යවරුන්ගේම කර මතින් සිය අවසන් ගමන ගියාය. ඇය ලොවට කියා දුන්නේ වචන රහිතව වුවද අසීමිත කැපකිරීමක් සහ ආදරයක් ලබාදිය හැකි ආකාරයයි.
