ඇමරිකානු අභ්යන්තර ආදායම් සේවය (IRS) සහ මහා භාණ්ඩාගාරය එක්ව ‘ට්රම්ප් ගිණුම්’ (Trump Accounts) විවෘත කිරීම සහ කළමනාකරණය කිරීම සම්බන්ධයෙන් නවතම මාර්ගෝපදේශ මාලාවක් නිකුත් කර තිබේ. 2025 වසරේ සම්මත වූ ‘One Big Beautiful Bill’ පනත යටතේ හඳුන්වා දුන් මෙම වැඩපිළිවෙළ මගින් සුදුසුකම් ලබන දරුවෙකු වෙනුවෙන් රජයෙන් එක් වරක් පමණක් ලබාදෙන ඩොලර් 1,000ක මූල්ය දායකත්වයක් හිමි වේ.
මෙම නවතම යාවත්කාලීන කිරීම් පිළිබඳ ප්රධාන තොරතුරු කිහිපයක් මෙසේය. 2025 ජනවාරි 01 සිට 2028 දෙසැම්බර් 31 දක්වා කාලය තුළ උපත ලබන සුදුසුකම් ලබන දරුවන් වෙනුවෙන් මෙම ගිණුම් විවෘත කළ හැකිය. දෙමාපියන්ට හෝ භාරකරුවන්ට IRS වෙබ් අඩවිය හරහා හෝ බදු වාර්තා ඉදිරිපත් කිරීමේදී ‘Form 4547’ නමැති පෝරමය භාවිත කරමින් මෙම ගිණුම් ආරම්භ කළ හැකි අතර, දරුවාට වයස අවුරුදු 17 සම්පූර්ණ වන වසරේ දෙසැම්බර් 31 වැනිදාට පෙර මෙය සිදු කළ යුතු වේ.
IRS ප්රධානී ෆ්රෑන්ක් ජේ. බිසිග්නානෝ (Frank J. Bisignano) ප්රකාශ කළේ මෙය ඇමරිකානු පවුල් ශක්තිමත් කිරීම සහ අනාගත පරපුරේ ආර්ථික ස්ථාවරත්වය වෙනුවෙන් ගත් සුවිශේෂී පියවරක් බවයි. මෙම වැඩපිළිවෙළ 2026 වසරේදී පූර්ණ වශයෙන් දියත් කිරීමට නියමිත අතර, ජූලි 4 වැනිදා සිට ගිණුම් විවෘත කිරීමේ ක්රියාවලිය නිල වශයෙන් ආරම්භ වනු ඇත.
මෙම ගිණුම් හරහා ඇමරිකානු සිහිනය (American Dream) සැබෑ කර ගැනීමට සහ පවුල්වල ආර්ථිකය ඉහළ නැංවීමට විශාල පිටුවහලක් ලැබෙනු ඇතැයි රජය අපේක්ෂා කරයි. අදාළ අයදුම්පත් සහ උපදෙස් පත්රිකා ඉංග්රීසි සහ ස්පාඤ්ඤ භාෂාවලින් IRS.gov වෙබ් අඩවියෙන් ලබා ගැනීමට දැන් පහසුකම් සලසා තිබේ.
