ශ්රී ලංකාවේ වත්මන් රජය කෙරෙහි ජනතාව තබා ඇති විශ්වාසය මෙරට ආර්ථිකය යථා තත්ත්වයට පත් කිරීමේ ක්රියාවලියේදී තීරණාත්මක සාධකයක් වී ඇති බව ජාත්යන්තර මූල්ය අරමුදලේ (IMF) කළමනාකාර අධ්යක්ෂිකා ක්රිස්ටලිනා ජෝර්ජියේවා මහත්මිය ප්රකාශ කරයි. ගෝලීය ආර්ථික සහයෝගීතාව පිළිබඳ පැවති සාකච්ඡාවකදී ඇය මේ බව පෙන්වා දුන්නාය.
ජෝර්ජියේවා මහත්මිය මෙහිදී කරුණු කිහිපයක් අවධාරණය කළාය. වත්මන් පාලනය අවංකව සහ වගකීම් සහගතව කටයුතු කරන බවට පවතින ජනතා විශ්වාසය නිසා රට වෙනුවෙන් දුෂ්කර ආර්ථික ප්රතිසංස්කරණ ඉවසා සිටීමට ශ්රී ලාංකිකයන් සූදානම්ව සිටින බව ඇය සඳහන් කළාය. එමෙන්ම ආර්ථික වර්ධනයෙන් ලැබෙන ප්රතිලාභ සුළු පිරිසකට සීමා නොවී සමාජයේ සෑම තරාතිරමකම ජනතාව වෙත සාධාරණව ගලා යාම රජය විසින් තහවුරු කළ යුතු බව ද ඇය පෙන්වා දුන්නාය. රට යහපත් මාවතකට අවතීර්ණ වී ඇති බවත් එය පවත්වාගෙන යාම සඳහා රජය සහ ජනතාව අතර පවතින මෙම සහයෝගීතාව අත්යවශ්ය බවත් ඇය වැඩිදුරටත් කියා සිටියාය.
මෙම ප්රකාශය හරහා ජාත්යන්තර මූල්ය අරමුදල ශ්රී ලංකාවේ පවතින දේශපාලනික ස්ථාවරත්වය සහ ආර්ථික කළමනාකරණය පිළිබඳව සිය ප්රසාදය පළ කර ඇති බව ආර්ථික විශ්ලේෂකයෝ පවසති.
