ඉරානයේ ඉස්ෆහන් (Isfahan) නගරයේ පිහිටි ගුවන් තොටුපළ ඉලක්ක කර ඊයේ (07) එල්ල කළ ගුවන් ප්රහාරවලින් ඉරාන ගුවන් හමුදාව සතු F-14 ප්රහාරක යානා (Grumman F-14 Tomcat) කිහිපයක් විනාශ කළ බව ඊශ්රායල ආරක්ෂක බලකාය (IDF) නිල වශයෙන් ප්රකාශ කර තිබේ. ඉරාන ඉස්ලාමීය විප්ලවීය ආරක්ෂක බලකායේ (IRGC) මධ්යස්ථානයක් ලෙස සැලකෙන මෙම ගුවන් තොටුපළ ඉලක්ක කර ගනිමින් මෙම ප්රහාරය දියත් කර ඇත්තේ ‘Operation Epic Fury’ මෙහෙයුමේ අඛණ්ඩ පියවරක් ලෙසිනි.
මෙම යුදමය තත්ත්වය පිළිබඳ නවතම තොරතුරු මෙසේය. ඉස්ෆහන් ගුවන් තොටුපළේ නවතා තිබූ ප්රහාරක යානාවලට අමතරව ඊශ්රායල ප්රහාරක යානාවලට තර්ජනයක් විය හැකි රේඩාර් සහ ගුවන් ආරක්ෂණ පද්ධති ද විනාශ කළ බව IDF පවසයි. මීට දින දෙකකට පෙර ටෙහෙරානයේ මෙහ්රාබාද් ගුවන් තොටුපළට එල්ල වූ ප්රහාරවලින් ‘කුඩ්ස් බලකායට’ අයත් ගුවන් යානා 16ක් විනාශ කළ බව ද ඊශ්රායලය මීට පෙර තහවුරු කර තිබුණි. ඉස්ෆහන් පළාතේ පිහිටි නැටන්ස් (Natanz) න්යෂ්ටික මධ්යස්ථානය ආසන්නයේ ද මෙම ගැටුම්කාරී තත්ත්වය පවතින අතර චන්ද්රිකා ඡායාරූප මගින් එම ප්රදේශයේ පවතින දැඩි යුදමය සූදානම තහවුරු කර ඇත. පෙබරවාරි 28 වනදා ආරම්භ වූ මෙම යුද්ධය හේතුවෙන් මේ වන විට ඉරානයේ පුද්ගලයන් 1,200කට අධික පිරිසක් මියගොස් ඇති අතර ගෝලීය බලශක්ති සහ ප්රවාහන ක්ෂේත්රවලට ද මෙයින් දැඩි බලපෑම් එල්ල වී තිබේ.
