ශ්රී ලංකාවේ දිස්ත්රික්ක 10ක් පුරා මිනිස් සිරුරට දැනෙන උෂ්ණත්වය හෙවත් ‘තාප දර්ශකය’ (Heat Index) ‘අවධානය යොමු කළ යුතු’ (Caution) මට්ටම දක්වා ඉහළ යා හැකි බවට කාලගුණ විද්යා දෙපාර්තමේන්තුව අද (08) පස්වරුවේ විශේෂ නිවේදනයක් නිකුත් කර තිබේ. මෙම තත්ත්වය විශේෂයෙන්ම බස්නාහිර, සබරගමුව සහ වයඹ යන පළාත්වලට මෙන්ම වවුනියාව සහ මන්නාරම යන දිස්ත්රික්කවල ඇතැම් ස්ථානවලට බලපානු ඇතැයි අපේක්ෂා කෙරේ. ඒ අනුව එම ප්රදේශවල වසන ජනතාවට සෙල්සියස් අංශක 39 සිට 45 දක්වා වූ දැඩි උෂ්ණත්වයක අත්දැකීම් විඳීමට සිදුවනු ඇති බව එම දෙපාර්තමේන්තුව පෙන්වා දෙයි.
පවතින දැඩි හිරු රශ්මිය හමුවේ විජලනය සහ අධික මහන්සිය වළක්වා ගැනීම සඳහා ප්රමාණවත් පරිදි ජලය පානය කරන ලෙසත්, හැකිතාක් සෙවණ ඇති ස්ථානවල රැඳී සිටින ලෙසත් සෞඛ්ය අංශ මහජනතාවගෙන් ඉල්ලා සිටියි. එසේම එළිමහනේ සේවය කරන පුද්ගලයන් සහ වැඩිහිටියන් මෙන්ම කුඩා දරුවන් පිළිබඳව ද අමතර අවධානයක් යොමු කිරීම වැදගත් වේ. සැහැල්ලු සහ ලා පැහැති ඇඳුම් ඇඳීම මගින් ශරීරයේ උෂ්ණත්වය පාලනය කර ගැනීමට සහායක් ලැබෙනු ඇතැයි ද උපදෙස් ලබා දී තිබේ.
