ශ්රී ලංකාවේ ස්වෛරීභාවයට ඇමෙරිකා එක්සත් ජනපදය ගරු කරන බවත්, මෙරට රැකවරණය ලබන ඉරාන නාවිකයන් සහ ඉරාන නෞකාව සම්බන්ධයෙන් අවසන් තීරණයක් ගැනීමේ පූර්ණ අයිතිය ශ්රී ලංකා රජය සතු බවත් ඇමෙරිකානු රාජ්ය දෙපාර්තමේන්තුව ප්රකාශ කර ඇත. රාජ්ය දෙපාර්තමේන්තු මාධ්ය ප්රකාශිකා ටැමී බෲස් පෙන්වා දුන්නේ, ඉරාන යුද නෞකා දෙකක් වන ‘අයිරිස් ඩෙනා’ (IRIS Dena) සහ ‘අයිරිස් බුෂර්’ (IRIS Bushehr) සම්බන්ධයෙන් මතුව ඇති රාජ්යතාන්ත්රික තත්ත්වයන් කළමනාකරණය කිරීමට ශ්රී ලංකාවට හැකියාව පවතින බවයි.
පසුගිය මාර්තු 4 වැනිදා ඇමෙරිකානු සබ්මැරීනයකින් එල්ල වූ ප්රහාරයකින් ‘අයිරිස් ඩෙනා’ නෞකාව මුහුදුබත් වූ අතර, එහි සිටි නාවිකයන් 32ක් බේරා ගැනීමට ශ්රී ලංකා නාවික හමුදාව සමත් විය. එමෙන්ම එන්ජින් දෝෂයක් හේතුවෙන් ත්රිකුණාමල වරායට රැගෙන ආ ‘අයිරිස් බුෂර්’ නෞකාවේ සිටි 219 දෙනෙකුට ද ශ්රී ලංකාව මානුෂීය පදනමින් රැකවරණය සපයා ඇත. මෙම ප්රහාරය නීත්යානුකූල බව ඇමෙරිකානු හමුදාවේ ආසියා-ශාන්තිකර අණදෙන මූලස්ථානය පවසන අතර, ඉරානය පවසන්නේ ප්රහාරය එල්ල වන අවස්ථාවේ නෞකාව නිරායුදව තිබූ බවයි. මෙම සංකීර්ණ භූ-දේශපාලනික වාතාවරණය හමුවේ ශ්රී ලංකාවේ ස්වාධීනත්වය ඇමෙරිකාව මෙලෙස පිළිගෙන තිබේ.
