විපතට පත් කාන්තාවන් සඳහා වූ නැගෙනහිර කාන්තා සන්ධානය (WCDM) මඩකලපුව ප්රදේශයේ ජනතාව සමඟ එක්ව ජනාධිපති අනුර කුමාර දිසානායක මහතා වෙත විශේෂ පෙත්සමක් ඉදිරිපත් කර තිබේ. 2026 මාර්තු 8 වන දිනට යෙදුණු ජාත්යන්තර කාන්තා දිනයට සමගාමීව ඉදිරිපත් කළ මෙම පෙත්සම මගින් ඔවුන් ඉල්ලා සිටින්නේ කාන්තාවන්ගේ ගෞරවය, සමානතාවය සහ යුක්තිය තහවුරු කෙරෙන ස්වාධීන ආයතනයක් ලෙස ජාතික කාන්තා කොමිසම පිහිටුවා එය ශක්තිමත් කරන ලෙසයි.
මඩකලපුව පදිංචිකරුවන් 1,803 දෙනෙකුගේ අත්සනින් යුතුව ඉදිරිපත් කළ මෙම පෙත්සම මගින් අවධාරණය කෙරෙන්නේ මෙරට කාන්තාවන් මුහුණ දෙන විවිධ ගැටලු විසඳීම සඳහා එවැනි ස්වාධීන කොමිසමක අවශ්යතාවය අත්යවශ්ය වී ඇති බවයි. විශේෂයෙන්ම ආපදා තත්ත්වයන් සහ සමාජීය ගැටලු හමුවේ කාන්තාවන් දැඩි පීඩාවට පත්වන බැවින් ඔවුන්ගේ අයිතිවාසිකම් ආරක්ෂා කිරීමට නීත්යානුකූල සහ ස්වාධීන යාන්ත්රණයක් පැවතීම වැදගත් බව කාන්තා සන්ධානය මාධ්ය වෙත අදහස් දක්වමින් සඳහන් කළේය.
සමස්ත ශ්රී ලංකාවේම කාන්තාවන් සමඟ සහයෝගීතාවයෙන් යුතුව මෙම ඉල්ලීම සිදුකරන බවත්, කාන්තාවන් මුහුණ දෙන දරුණු ගැටලුවලට සාධාරණ විසඳුම් ලබා ගැනීමට නම් ජාතික කාන්තා කොමිසම සක්රීයව ක්රියාත්මක විය යුතු බවත් ඔවුන් වැඩිදුරටත් පෙන්වා දෙයි. වත්මන් රජය මගින් කාන්තා අයිතිවාසිකම් සුරැකීමට ලබා දී ඇති පොරොන්දු ප්රායෝගිකව ක්රියාත්මක කිරීමේ වැදගත් පියවරක් ලෙස මෙම කොමිසම පිහිටුවීම ජනතාවගේ අපේක්ෂාවයි.
