ඝාතනයට ලක්වූ ඉරාන උත්තරීතර නායක අයතුල්ලා අලි කමේනිගේ පුත්රයෙකු වන 56 හැවිරිදි මොජ්තාබා කමේනි (Mojtaba Khamenei) එරට නව උත්තරීතර නායකයා ලෙස පත් කර තිබේ. ඉරාන විශේෂඥ සභාවේ (Assembly of Experts) තීරණාත්මක ඡන්දයකින් ඔහු තේරී පත් වූ බව ඊයේ (08) රාත්රියේ එරට මාධ්ය වාර්තා කළේය.
මෙම පත්වීම සහ එහි ගෝලීය බලපෑම පිළිබඳ තොරතුරු මෙසේය. ඉරාන විප්ලවීය හමුදාව (IRGC) සමඟ සමීප සබඳතා පවත්වන මොජ්තාබා කමේනිගේ පත්වීම හරහා ටෙහෙරානය ලබා දෙන පණිවිඩය වන්නේ ඇමෙරිකාව සහ ඊශ්රායලය සමඟ පවතින යුද්ධයේදී තමන් කිසිසේත්ම පසුබසින්නේ නැති බවයි. හෝර්මුස් සමුද්ර සන්ධිය (Strait of Hormuz) වසා දැමීම හේතුවෙන් ඉරාකය, කුවේට් සහ එක්සත් අරාබි එමීර් රාජ්යය වැනි රටවල තෙල් නිෂ්පාදනය අඩාල වී ඇති අතර බහරේනයේ ප්රධාන බලශක්ති සමාගම ද සිය මෙහෙයුම් අත්හිටුවා තිබේ.
ගෝලීය ආර්ථිකයට මෙහි බලපෑම අතිමහත්ය. අද (09) පෙරවරුවේ ලන්ඩන් වෙළඳපොළේ බ්රෙන්ට් (Brent) වර්ගයේ බොරතෙල් මිල බැරලයකට ඩොලර් 120 දක්වා ඉහළ ගිය අතර, එය වසර 4කට පසු වාර්තා වූ ඉහළම මිල වේ. පවතින තත්ත්වය හමුවේ G-7 රටවල් සිය උපායමාර්ගික තෙල් සංචිත වෙළඳපොළට මුදා හැරීම පිළිබඳව සාකච්ඡා කරමින් සිටින බව වාර්තා වේ.
ඇමෙරිකානු ජනාධිපති ඩොනල්ඩ් ට්රම්ප් මෙම පත්වීම දැඩි ලෙස විවේචනය කර ඇති අතර, ඩොලර් 100 සීමාව ඉක්මවා තෙල් මිල ඉහළ යාම “සුළු කැප කිරීමක්” ලෙස හඳුන්වා තිබේ. ඉරාන න්යෂ්ටික තර්ජනය විනාශ කිරීමෙන් පසු තෙල් මිල වේගයෙන් පහත වැටෙනු ඇති බව ඔහු පවසා ඇත. ඇමෙරිකාව සහ ඊශ්රායලය අඛණ්ඩව ඉරානයට ප්රහාර එල්ල කරන අතර ඉරානය ද ඩ්රෝන සහ මිසයිල මගින් ප්රතිප්රහාර එල්ල කරමින් සිටී.
